Topic: Pasalip
AGTAPOS iti Enero a nagpatingga ti panagawatmi kadagiti maisalip. Agasem ta dimtengen ti Enero 1, awan pay laeng naawatmi nga entry. Ket husto ti atapmi. Bassit dagiti nakisalip.
Mabalin a narigatan dagiti mannurat a nagputar iti sarita a mangtratar iti naidiaya a tema - tao kontra nakaparsuaan. Apay ngata? Saan kadi a makigubgubal ti tao iti nakaparsuaan iti inaldaw? Iti kasta, nalaka koma laeng nga ikur-it ni mannurat daytoy. Mabilbilang kadi pay laeng dagiti sarita a nasurat maipanggep iti tao kontra nakaparsuaan? Ta uray dakami, awan nasapulanmi a sarita a naaramat koma a modelo para iti daytoy a pasalip.
Adda met apaglabes duapulo a naisalip. Umanayen a bilang a pakaarisitan dagiti lima a mapadayawan a sarita. Ah, ngem kasano met ti linaon dagiti naisalip. Nasayaat no adda makapasa iti pagrukodan dagiti hurado. Iti bukodmi a paliiw, mabingaymin a dagus dagiti naisalip iti dua a grupo: passive (dagiti nangsurat iti saritana a manglaglagip wenno napalabasen ti sarsaritaenna) wenno active (dagiti nangsurat iti saritana iti agdama. Madama a mapaspasamak dagiti eksena.)
Nasisiaat nga amang no nasurat ti sarita iti agdama a pasamak. Kayatmi a sawen, mapaspasamak dagiti eksena iti sarita bayat iti panangbasam. Matiliw a dagus ti essem ti agbasbasa. Saan ket a kas iti sarita a napasamaken dagiti eksena. Nakapsut no kuan ti kidagna. Nakapsut payen a mangsilo iti puso dagiti readers.
Manmano dagiti sarita a nakatiliw a dagus iti interesmi. Daydiay sarita maipanggep iti troso, daydiay mangngalap iti taaw, ken daydiay agminmina. [Apo Hurado, daytoy ket bukodmi laeng a paliiw. Saanmi nga im-impluensiaan no ania man ti pangngeddengyo.] Kaaduan ngata kadagiti sarita ti inibbatanmi ta dimi mapugtuan ti kayat nga ibuksilan ni mannurat. Kayatmi a sawen, kasla saanmi a maanninawan no agirig met laeng ti sarita iti naidiaya a tema. Isu nga ibatimi a pagrebbengan dagiti hurado no ania dagiti sarita a mapilida. Ken mangkutkot ti kaipapanan ti sarita no simmurot met laeng iti tema: maipanggep iti tao kontra nakaparsuaan ken ipakitana ti kultura ni Ilokano."
Ita, pampanunotenmi manen no ania ti topiko wenno tema a mausar iti 8th RFAAFIL. Addan napilimi ngem amangan ta ad-addanto manen a marigatan dagiti mannurat a mangsangal kadagiti saritada. Malagipmi la ket ngarud daydi tema a panagsakripisio. Kasla nakibur dagiti mannurat idi.
Nupay makunami a nakisang wenno naeppes dagiti naisalip iti sarita, maigiddiat ketdi dagiti naisalip iti daniw. Adu dagiti napipintas a pagpilian. Adu dagiti magustuanmi. Maibilangen ditoy ti daniw nga inaramatmi kadagiti panid ti pagtaenganmi.
Sapay koma ta saan nga agkudkod iti ulo dagiti hurado gapu ta marigatanda nga agpili wenno marigatanda nga awan mapilida kadagiti naisalip iti 7th RFAAFIL. Ngem ala, paset daytoyen iti pakasaritaan ti RFAAFIL. Mabalin a makuna a naabak dagiti mannurat a nakilaban iti nakaparsuaan. Wenno apektadoda iti krisis nga agdama a mapaspasamak.
Iti sabali a bangir, naragsakkami ketdi gapu iti ayat nga it-ited latta dagiti mannurat iti pasalipmi. Makapatibker pakinakem dagiti komento a maaw-awatmi. Kas kuna ti maysa a nakisalip: "Makisalipak iti RFAAFIL gapu ta daytoy ket patienmi...." Saanmin nga ituloy ti nayonna.
Good luck kadagiti mannurat a nakisalip. Agyamankami unay kadakayo!
[Daytoy ket bukodmi laeng a paliiw a kas esponsor ken kas maysa a reader. Naikur-itmi dagitoy para kadagiti agbasbasa. Pagliwliwaan para iti panaguray iti resulta ti pasalip.]
