Topic: Pasalip
GAPU iti napalabas a blogmi, adu dagiti reaksion a naawatmi. Ah, ngem kas kunami a kankanayon ken immalditmi manen iti baba daytoy a blogmi: "Dagitoy ket bukodmi a paliiw....."
Tunggal tawen a panagpasalip, adda dagiti bambanag nga imutektekanmi. Kas ita a tawen, naidumduma manen ti tema. Maysa pay daytoy a mainayon iti sirigenmi. Ket wen, nakapasa kadi met laeng dagiti naisalip iti tema? Daytoy ngamin ti kangrunaan a basehan dagiti hurado [ken basehanmi a mangipudos] kadagiti naisalip. Addayta pay ti pagannurotan: Nasken nga ipakitana ti kultura ni Ilokano. Ta apay pay la nga agpaspasalipkami no saan met a tumulong a mangbiag iti kulturatayo.
Ket wen, sublianmi man ti tema - tao kontra nakaparsuaan. Kadagiti nabasami, nagduduma ti panangtratarna. Kasano ti pannakaiparangna iti sarita. Nasurot kadi met laeng? Adda daydiay napintas a sarita iti panagkunami a mabalin a maipablaak a dagus. Ah ngem, tao kontra taon sa met daytoy a sarita. Naidetalye ti wagas ti panagdaklis ngem maatiw gapu iti tema. Patgenmi a Mannurat iti likudan ti sarita a PANGEN, napintas ti saritam. No ipatulodmo iti Bannawag, namnamaem a maipablaak.
Adda met daydiay saan met a nakaparsuaan ti kalabanna. Kas koma natay daydiay mangngalap gapu iti dinamita. Adda met daydiay awan pulos risiris iti nagbaetan ti tao ken nakaparsuaan.
No naglaban ti tao ken nakaparsuaan, asino ti mangabak? Ala ket depende daytan ken ni mannurat no asino ti pinangabakna. Ngem sabali metten ti nagturongan daytoy a blogmi. Ituloyminto iti sabali a blog.
DAGITI magusttuanmi a daniw iti 7th RFAAFIL. Kitaemon, Patgenmi a Mannurat, no napilimi ti daniwmo
Dagitoy da man: 1. Baribari Kontra Bisin, Tig-ab Kontra Gawat: Dallang iti Nakaparsuaan ti Bagas – ni Desaparecido 3. Saluadantay' 'Toy Pagtaengan nga Impaay ti Namarsua – ni Ozone L. Ayer 5. Mariknak ti Saem Dagiti Agarubos a Luam, Nanangko! – ni ‘Toy Anakmo 7. Tedted ti Dara ti Daniw iti Nagbenditaan a Bangabanga – ni Laong Laan T. Padsan 11. Baribari ti Nabatbatian nga Ipes iti Payugpog ti Armageddon – ni Eksodus Thaddeus 13. Dagiti Bantay Idiay Bagani Ubbog – ni Juan Dragon 14. Panangpasangbay iti Niebe – ni M. Jeremy Castillo 20. Ballaag – ni Sagawisiw T. Sagat 21. Kiddaw-Pakaasi ti Goldfield – ni Minero Moreno 22. Diakton nga Agsubli Pay – ni Yo Patingyo 27. Dung-awanka, Dan-aw Daytoy Dagak – ni Dukesa A. Napili
Uray makipinnustakami, maysa kadagitoy a daniw ti mangabak.
MENSAHE: Dagitoy ket bukodmi a paliiw kas maysa nga esponsor, nanumo a mannurat ken gagangay nga agbasbasa kadagiti naisalip ita a tawen. Awan sabali a pinanggepmi no di laeng mangted iti sangkapirgis nga impormasion kadagiti naisalip ken mangted iti pagliwliwaanyo bayat iti panaguray iti resulta ti pasalip.
No adda man dagiti nagkamtudanmi, pagpaspasensiaandakami. Awan sabali a pampanunotenmi no di ti pagragsakan dagiti agbasbasa a sumangbay ditoy pagtaenganmi iti Internet.
