E-lokano Mail #314
Kenka RFAAFIL,
Maysaak kadagiti mangsarsarungkar iti rfaafil.com nangruna iti umuna nga innem a bulan ti tawen. Maayatanak a mangsubaybay kadagiti pasamak iti pasalipyo. Mano kadi dagiti naisalip? Apay metten nga inaladanyo ti listaan dagiti naisalip ita a tawen? Pagaayatko ket ti agpugto base kadagiti paulo ti naisalip no ania kadagitoy ti posible a mangabak.
Nupay saankayo a personal nga am-ammo a mangimatmaton iti RFAAFIL, dayawek ti regtayo nga agpaspasalip ken ti panangipategyo iti pagsasaotayo. Sapay ta itultuloyyo latta ti nasged a tarigagayyo iti lubong ti kurditan Iluko. Agbiagkayo!
-ooOoo-
Patgenmi nga Agbasbasa, agyamankami iti dakkel iti daytoy a suratmo. Agbalin daytoy a paratignaymi nga umaddang.
Iti agdama, no la ketdi naawat aminen dagiti naikoreo iti petsa ti Enero 31, 2010, aganay a 27 iti sarita (lima kadagitoy ti naikoreo) ken 17 iti daniw dagiti naisalip. Maipablaakto met laeng dagitoy. Iti panawen ti pannakapili dagiti mangabak, ilemmengmi pay laeng ita ti listaan kadagiti readers ngem saan ketdi kadagiti nakisalip. Kayatmi a nawaya dagiti nakisalip a mangammo kadagiti bambanag wenno debelopment ti pasalipmi. Kayatmi metten nga ipulsuan ti panangbisita dagiti nakisalip kadayta inaladanmi a panid.
Ulitenmi, Patgenmi a Reader, agyamankami unay iti dakkel iti daytoy a suratmo.
