E-lokano Mail #316
Naimbag nga aldawyo dita, RFAAFIL!
Lugayak unay dagiti pasalipyo. Nakaay-ayat daytoy napanunotyo a pasalip iti Facebook. Maysa daytoy a pagraragsakan, pagsasarakan dagiti Ilokano a padak. Makigubalak met koma ngem awanto met laeng labanko. Nakapsut ti kabaelak ken awan ti adu a pasurotko nga agLike iti daniwko.
Kablaawankayo iti nagtengyon a maysa a dekada.
-oo0oo-
Patgenmi nga Agbasbasa, naimbag met nga aldawmo! Agyamankami iti orasmo a nangsangal ken nangipatulod daytoy suratmo.
Maragsakankami a makaammo iti napintas nga epekto kenka daytoy pasalipmi iti Facebook – daniw a mairuknoy iti RFAAFIL – para iti pannakaselebrar ti maika-10 nga anibersariomi nga agpaspasalip. Kinapudnona, maragsakankami unay ta agsisimparaten ti komunikasion dagiti Ilokano iti RFAAFIL PULSE (nagan ti facebook ti RFAAFIL). Saan a ti panaglatak ti RFAAFIL kas agpaspasalip ti pakaragsakanmi no di ket ti panaglatak wenno pannakayasideg ti pagsasao nga Iluko kadagiti Ilokano a naipuritak iti amin a paset ti lubong. [Agyamankami, Facebook, iti daytoy benepisio nga itdem kadakami nga Ilokano. Ikari ti RFAAFIL nga aramatendaka iti napintas a wagas.]
Idi iwayatmi daytoy a pasalip, pinanunotmi a naimbag no adda met laeng mayat a makisalip. Ta ngamin, maipaskil a dagus ti daniw a saan laeng a dagiti hurado ti makabasa kadagitoy a daniw. Saankami a nagamak iti daytoy baro a pagannurotan ta ammomi a ti daniw ket specific a mairuknoy iti RFAAFIL. Saanto la ketdi a masayangan ni mannaniw iti daniwna ta saannanto metten a maaramat pay daytoy iti pasalip ti sabali.
Saanka koma nga agamak a makisalip, Patgenmi nga Agbasbasa. No bassit man ti pasurotmo a mangLIKE iti daniwmo, adda met pay dagiti sabali a gunggona. Dagitoy a daniw ket addanto amin puestoda ditoy pusomi. Adda amin kaikarianda dagitoy iti RFAAFIL – iti rfaafil.com, iti RFAAFIL Pulse, iti panid ti libro ken iti pakasaritaanmi kas agpaspasalip. Mangparegta kadakami amin dagitoy a daniw iti panangragpatmi ti maikadua a dekada para iti panangparang-ay ti pagsasaotayo.
