E-lokano Mail #305
Saan pay gayam a nalpas ti isyu maipanggep iti napasubli a premio ni Apo Aragon. Nabasami ti panangtirana ti RFAAFIL iti Facebook accountna. Facebook pay met ngarud, napardas nga agwara. Saanyo kadi a dependaran ti dayaw ti RFAAFIL?
"Nalpasen ti isyu ti pannakaibabawi ti premio ni Apo Aragon a nangabak iti Salip ti Daniw iti tao kontra nakaparsuaan. Ngem ti nabati nga isyu ita, a saan pay a naisara, ket ti pannakaibabawi met dagiti dadduma pay a daniw a kinednganna a naglabsing met. Nupay nagbalin daytoy a reaksionna iti pannakaibabawi ti premiona, ibilangmi daytoy a protesta iti pasalipmi a nasken a malawlawagan. Ur-urayenmi ita ti desision dagiti maseknan a hurado.
Iti sabali a bangir, saanmi a nabasa no ania man ti inlanadna iti Facebookna a maikontra iti RFAAFIL. Awan ti karbenganmi a sumagpaw iti ruar ti inaladanmi. Nawaya ti asino man nga agsao iti kayatna." - RFAAFIL
