E-lokano Mail #313
Madaydayaw nga RFAAFIL!
Kayatmi man nga ipakaammo kadakayo nga adu dagiti nabasami iti Facebook maipanggep iti pasalipyo. Wen, naiFacebooken ti RFAAFIL! Ti dakesna, saan a nasayaat dagiti naagapad kadagiti nabasak. Addayta, a rabngisenna ti dayawyo a kas agpaspasalip. Addayta, a rukurokenna ti kongkreto a pundasionyo. Addayta, a patayenna ti ayatyo a mangpabaknang iti kultura ni Saluyot. Tapno ammoyo ti ag-agapadenmi, adtoy ti sapot a sumrekanyo. ---
Saan ngata met a dakes no dependaranyo ti nagan ti RFAAFIL. Kastan. Have a good day!
Patgenmi a Reader, agyamankami iti panangisakitmo iti RFAAFIL. Saanmi nga inlanaden ti link ti facebook address nga intedmo kadakami. Saanmi metten a panggepen a serken pay daytoy. No asinoda man, bay-anmi nga agsaoda latta maikontra iti RFAAFIL ken uray payen iti bukodmi a bagi. Nasayaat pay ketdi ta imbunannagdan ti akemda - ti mangumsi, mangkritikar ken mangkritikarto latta kadakami. Amin a garawmi, amin a pasamak iti pasalipmi, addanto latta masaoda. Daytan ti akemda. Ngem daytoy laeng ti makunami, saanto a tubeng dagitoy iti panagtuloy ti addangmi. Iti sabali a panirigan, pagyamananmi pay ketdi dagiti mangdaddadael iti RFAAFIL ta ad-adda met a patangkenenda ti sangimi.
Dagiti makainspirar a mensahe nga aggapu kadagiti readers, dagiti maisalip a sarita ken daniw nga aggapu kadagiti mannurat, dagiti tulong ken ayat nga aggapu kadagiti hurado ken dagiti managparabur nga esponsor, ken , dagiti pannarabay ken sursuro nga aggapu ken ni Apo a Namarsua ti mangpatpatibker a kanayon kadakami. Nalagda dagitoyen a pundasionmi. - RFAAFIL
