E-lokano Mail #308
Mainaig pay laeng iti kalkalpas a pakontes ti RFAAFIL, dagitoy man ngarud ti kayatko a maammuan a saan a panangisidir no di ket malawlawagankami koma kadagiti bambanag a pagtaktakderanmi a nakisalip ken siaayat a mangpabaknang iti Lenguahe ken iti Literaturatayo. Ulitek, saan a panangibaba iti dignidadyo a mangipatpataray iti RFAAFIL iti siamen a tawen ngem kas nasaokon, tapno malawlawagan dagitoy iti kalkalpas a pasalipyo iti sarita.
Ania a gapu ken ania ti konstraktibo a nagbatayan dagiti appo a naghurado a maysa laeng a sarita ti napilida a nangitedanda iti Special Prize? Bassit man wenno adu ti naawatyo a sarita, ninamnamami a nakisalip a saan koma a nangedngedan no di ket nasurot koma ti nailanad a premio iti pagannurotan. Ngem iti daytoy kalkalpas a pasalip, naiwalin a naminpinsan dagiti nadakamat a gunggona ket impaayyo ketdi ti Espesial a Gunggona nga awan ken saan a nailanad iti pagannurotan ti nasao a pasalip.
No bilang ta bassit dagiti naisalip a sarita, ket daytoy ti nagrasonan dagiti appo a kameng ti hurado iti dida panangsurot kadagiti nailanad a premio ket maysa laengen a premio nga Special Prize ti nagnunumuanda nga ipaay, nalablabit a saan a nakappapati daytoy a banag. No bilang ta lima wenno innem laeng ti naisalip a sarita, adda gapuna ngarud nga Special Prize ti maited a gunggona ti mangabak, adda rebbengna a kasta ti maited a premio ti nangabak. Ngem no ad-adu ngem iti dayta, ket awan latta ti nakatignayan ti puso ken panunot dagiti naghurado, nupay impennek ngata met amin a kabaelan dagiti nagsurat a nanglinlinay iti pinakisalipda a sarita, kayatna kadi a sawen ngarud a kimmunengen dagiti mannuratayo? Kayatna kadi a sawen a ti Fantasia a tema ti sarita a napagsasalipan ket awan ti nakaperpekto iti kayatyo koma a pakabuklan dagiti naisalip? No daytoy ngarud ti pagibasaran, nalabit a kimmuneng ngarud dagiti mannurat a nangdebelop kadagiti insalipda a sarita pakaseknan iti Fantasia a tema.
Tapno saan koma a natippingan iti sangkabassit a tippingna ti nasudi a dignidad ti RFAAFIL kas kangrunaan ita nga agpaspasalip pakaseknan iti Literatura Ilokana, masapul koma nga impettengna mainaig iti pangngeddeng dagiti appo a naghurado iti salip ti pannakaipaay met laeng dagiti premio kas nailanad iti naiwaragawag a pagannurotan ti salip. Ta anianto man ngaruden ti masao dagiti pada a mannurat no kasdiayto manen ti mapasamak a pangngeddeng dagiti hurado iti sumaruno a pasalipyo?
Ken kamaudiananna, kayatko nga ilawlawag a daytoy a komento nga idasarko ita ket saan a pakadadaelan ti nabaneg a pondasion ti RFAAFIL a kangrunaan ita nga agpaspasalip iti benneg ti literaturatayo, ngem ketdi maysa daytoy a pangsalaknib ti kabukbukodantayo a literatura nangruna ti RFAAFIL, ta ti napasamak iti kalkalpas a pasalip ket ipakitana a "kimmapsut" siguro ti kabaelan ti pluma dagiti mannurat pakaseknan iti natratar a tema ti salip.
