INDAULUAN ni Johmar R. Alvarez, tubo ti Ballesteros, Cagayan, ti Umuna a Gunggona iti Salip iti Daniw a Para Ubbing ti 9th Reynald F Antonio Awards for Iluko Literature (RFAAFIL 2010-2011) babaen ti daniwna a "Linnemmengan". Mangisursuro iti Aparri West National High School iti Aparri, Cagayan. Isu ti adviser ti The Beachcomber, ti opisial a pagiwarnak ti nasao a pagadalan. Umawat ni Alvarez iti P2,000.00 ken Sertipiko ti Pammadayaw.
Dagiti dadduma pay a nangabak:
Maika-2, Derick Marcel F. Yabes ti Sanchez Mira, Cagayan babaen ti daniwna a "Ti Pusak a Gusing". Damona ti mapadayawan iti pasalip ti RFAAFIL. Umawat ni Yabes iti P1,500.00 ken Sertipiko ti Pammadayaw.
Maika-3, Benjamin P. Pacris ti Bantay, Ilocos Sur babaen ti daniwna nga "Abakada ni Bulaylay." Agdama a chief information officer iti Philippine Information Agency iti Ilocos Sur. Sumagmamanon dagiti daniwna ti napadayawan iti pasalip ti RFAAFIL. Umawat ni Pacris iti P1,000.00 ken Sertipiko ti Pammadayaw.
Maika-4, Agustin DC. Rubin ti Subic, Zambales babaen ti daniwna a "Ti Trayanggulomi." Retirado. Premiado a mannurat. Namin-adun a napadayawan iti Umuna a Gunggona iti pasalip ti RFAAFIL. Umawat ni Rubin iti P500.00 ken Sertipiko ti Pammadayaw.
Maika-5, Jobert M. Pacnis ti Ballesteros, Cagayan babaen ti daniwna a "Ditoy." Maysa a mannursuro. Umawat ni Pacnis iti P500.00 ken Sertipiko ti Pammadayaw.
Maika-6, Mighty C. Rasing ti Metro Manila babaen ti daniwna a "Daytoy Lapisko." Agserserbi a kas Philippine Staff ti Division on Ministries with Young People, maysa nga ahensia ti United Methodist Church. Umawat ni Rasing iti P500.00 ken Sertipiko ti Pammadayaw.
Inkeddeng dagiti hurado nga innem ti mapadayawan a daniw. Dagiti naghurado: Prodie Gar. Padios, pangulo; kameng da Jeff A. Apolonio ken Ariel S. Tabag.
Dagiti 18 a naisalip a daniw: Agbalinka a Taga-Calamba - ni Laong-laan T. Dimasalang; Ditoy - ni Father; Iliw ti Anak iti Ina - ni Dayag T. Amianan; Saririt ti Ubing, Birtud ti Pagilian - ni Anonymous; Ti Trayanggulomi - ni Bayangbayang; Apocutopia: Ayat iti Kulturan' Samtoy - ni De Amor, Corazon; Ti Umuna Nga A Ba Ka Datayo - ni Grado Uno; Daytoy Lapisko - ni Art Rapaap; Ti Pusak a Gusing - ni A. Sanchez; Linnemmengan - ni Pik-Pak-Boom!; Dallang ken Dung-aw ni Ineng (Ruknoy Para ken ni P-noy) - ni Bas Sit A. Timec; Kenka a Namnama - ni Awan T Parbo-A-Naganna; ABAKADA ni Bulaylay (Daniw para ken ni Abby A., Grade III iti Central School iti Ilokos) - ni Apong Bucanegan; Kuna ni Mam... Kuna ni Inang... Kuna ni Tatang... - ni Amboy; Pagwadan - ni Alcala Sanchez;
Dagiti Inaldaw a Pannakigubat iti Biag da Boyet ken Dagiti Gagayyemna a Makiay-ayam iti Wayawaya a Naatap - ni Corazon de Amor; ken, Agawidkamin, Titser! - ni Esto D. Antes.
Maidasar dagitoy nangabak a daniw kadagiti agbasbasa tapno pilienda ti mapadayawan iti RFAAFIL 2011 Reader’s Choice Award. Mairakurak dagiti pagannurotan para iti pannakipartisipar iti Reader’s Choice Award iti website a www.rfaafil.com a pagtaengan ti RFAAFIL iti Internet. Kadagiti lima a daniw a napadayawan iti 8th RFAAFIL, napili dagiti readers ti daniw ni Agustin DC. Rubin a "Rissik ti Panunot, Kannawidan Rumasuk" a mapadayawan iti 2010 RFAAFIL Reader's Choice Award.
Mapadayawan dagiti nangabak bayat ti maika-43 a Komperensia Nasional ti GUMIL Filipinas iti Cabugao Beach Resort, Pug-os, Cabugao, Ilocos Sur a maangay inton Abril 15-17, 2011.
