Bonus a Pasalip iti 10th RFAAFIL - Salip iti Daniw a Mairuknoy iti RFAAFIL
Silulukaten ti Salip iti Daniw a mairuknoy iti RFAAFIL kas paset ti pannakaselebrar ti maika-10 a tawen ti RFAAFIL. Maaramat ti opisial a facebook account ti RFAAFIL - www.facebook.com/rfaafil - daytoy a pasalip. Dagiti pagannurotan:
1. Silulukat ti salip kadagiti mannaniw iti Iluko.
2. Agatiddog ti daniw iti di ab-ababa ngem 20 a linia. Mabalin a maysa wenno dua a daniw ti isalip ti kada mannaniw. Masapul nga original ken di pay naipablaak iti uray ania a magasin, pagiwarnak wenno Internet.
3. Nawaya ti mannaniw a mangsurat iti estilo wenno pannakasukog ti daniwna. Ngem nasken a ti daniw ket mairuknoy iti RFAAFIL.
4. Adda karbengan ti esponsor a mongiposte a dagus ti maisalip a daniw iti facebook ti rfaafil, ken mangilibro wenno mangipablaak kadagiti mapadayawan a daniw iti magasin wenno iti Internet (rfaafil.com) nga awan sungsungbatanna iti mannaniw. Agtalinaed ketdi ti copyright iti autor.
5. Mabalin nga aramaten ti mannaniw ti pudno a naganna wenno aglinged latta iti parbo a naganna. No agaramat ni mannaniw iti parbo a nagan, saanto a maibutaktak ti kinasiasinona malaksid no mapadayawan ti daniwna.
6. Ti sekretriat ti RFAAFIL ken dagiti readers ti facebook ti rfaafil ti mangpili kadagiti mapadayawan a daniw.
7. Dagiti gunggona: Umuna, P2,500.00 ken sertipiko; Maika-2, P2,000.00 ken sertipiko; Maika-3, P1,500.00 ken dua a consolation prize a sag-P1,000.00 ken sertipiko. Mabalin a mangabak ni mannaniw iti dua a premio. Maipaay met ti Reader’s Choice Award iti daniw a magustuan dagiti facebook readers ken makapuntos iti adu a LIKE. Umawat ti mapadayawan iti P2,500.00 ken sertipiko.
8. Mapadayawanto dagiti mangabak inton kalgaw ti 2012.
9. Ipatulod ti pakisalip babaen ti e-mail: iturong iti rfaafil@hotmail.com ken admin@rfaafil.com. Wenno nasaysayaat no ipaskil iti message board wenno iti wall ti facebook ti rfaafil.
10. Nasken a mai-e-mail wenno maiposte iti facebook ti rfaafil ti pakisalip iti di naladladaw ngem Enero 31, 2012. Nasaysayaat no nasapsapa a maisubmitir ti pakisalip.®
