Adtoy ti kompleto a listaan dagiti nangabak iti Salip iti Sarita ken Salip iti Daniw ti 8th Reynald F. Antonio Awards for Iluko Literature: Iti benneg ti sarita (salip iti panagsurat iti sarita a pantasia), maysa laeng ti napili dagiti kameng ti hurado a pakaipaayan ti gunggona, ni Virgilio S. Naungayan, maysa a mangisursuro iti eskuela publika iti Candon City. Naipaay ken ni Naungayan ti Naisangsangayan a Gunggona (Special Prize) babaen ti saritana a “Ti Naisar-ong a Lungon”. Immawat ti autor iti sertipiko ken P8,500.00 a cash prize.
Dagiti met nangabak iti Salip iti Daniw: Umuna, Agustin DC. Rubin ti Subic, Zambales babaen ti daniwna a “Rissik ti Panunot, Kannawidan Rumasuk”; Maikadua, Florentino V. Rosal, ti Urdaneta City babaen ti daniwna nga “Umok ti Ragsak”; Maikatlo, Severino V. Pablo ti Laoag City, Ilocos Norte babaen ti daniwna a “Saringit ti Pamilia: Anus a Naullo iti Panawen ti Rigat”; Maikapat, Florentino V. Rosal babaen ti daniwna a “Daytoy ti Gapuna No Apay a Subliananka”; ken Maikalima, Agustin DC Rubin babaen ti daniwna nga “Organiko”.
Nayawat dagiti gunggona iti 42nd GUMIL Filipinas Convention iti Pangil Beach Resort, Currimao, Ilocos Norte idi Abril 9, 2010. Dagiti naghurado iti agpada a kategoria: Ariel S. Tabag, chairman; kameng da Juan Al. Asuncion ken Cles B. Rambaud.
Iti sabali a bangir, nayawat met ti RAAFIL Reader’s Choice Award (pammadayaw iti sarita ken daniw a magustuan dagiti agbasbasa iti bukodda a panagraman) bayat ti nasao a kombension dagiti mannurat. Naipaayan iti sertipiko ken cash prize a P3,000.00 ti “Ni Kanor ken Siak iti Taaw” a sarita ni Danilo B. Antalan idinto a sertipiko ken cash prize a P1,000.00 met ti “Mariknak ti Saem Dagiti Agarubos a Luam, Nanangko!” a daniw ni Agustin DC. Rubin para iti 2009.
Ti panagtultuloy a pannakaputar dagiti dekalidad a sinurat ti panggep a ragpaten ti RFAAFIL Reader’s Choice Award babaen ti ayat ken tulong dagiti agbasbasa.
Ipakaammo met ti RFAAFIL Secretariat a silulukaten ti pasalip ti RFAAFIL para iti maika-9 a tawen a panagpasalipna. Makapakatawa a sarita ti mapagsasalipan iti Salip iti Sarita idinto a daniw a para ubbing ti masangal iti Salip iti Daniw. Nairanta dagiti daniw para kadagiti ubbing nga agad-adal iti Prep agingga iti Grado Tres.
