INYALAT ni Crisostomo M. Ilustre, tubo ti Bauang, La Union ngem agnaed itan iti Vigan City, ti Umuna a Gunggona iti Salip iti Makapakatawa a Sarita ti 9th Reynald F Antonio Awards for Iluko Literature (RFAAFIL 2010-2011) babaen ti saritana a "Ni Congressman Atong Bal". Agdama nga Operations Consultant ti maysa a network dagiti FM radio stations. Umawat ni Ilustre iti P10,000.00 ken Sertipiko ti Pammadayaw. Damona ti mangabak iti pasalip ti RFAAFIL.
Dagiti dadduma pay a nangabak:
Maika-2, Arnold P. Jose ti Laoag City babaen ti saritana nga "Idi Makigasanggasat ni Tiririt, Ti Pilusupo a Dalag". Premiado a mannurat. Sumagmamanon dagiti pammadayaw a nagun-odna iti pasalip ti RFAAFIL. Umawat ni Jose iti P7,000.00 ken Sertipiko ti Pammadayaw.
Maika-3, Danilo B. Antalan ti Candon City, Ilocos Sur babaen ti saritana a "Bitong Lukalayk Kontes." Agdama nga agpapaay a newswriter, reporter ken announcer iti DZTP Radio Tirad Pass. Premiado a mannurat. Namin-adun a napadayawan iti pasalip ti RFAAFIL. Umawat ni Antalan iti P5,000.00 ken Sertipiko ti Pammadayaw.
Awan ti Maika-4 ken Maika-5 a Gunggona kas inkeddeng dagiti hurado.
Dagiti naghurado: Dionisio S. Bulong, pangulo; kameng da Juan Al. Asuncion ken Cles B. Rambaud.
Dagiti 27 a naisalip a sarita: "Maysa a Panid iti Biag ni Torio" ni Anniniwan, "Ansisit" ni Calawagan Dakkel, "Kapitan Inciong: Gred Por, Row Por" ni Gerry Bacud, "Ti Labandera - ni D. Amammo, "Ti Panagpasiar ni Gohan" ni Mandirigmang Lobo, "Narvacan" ni Nar V. Acan, "Ipitlota, Baket" ni Dr. Mariano “marnie” Guinarrafon Jr., "Ayek-ek Ti Tarektek, Lengguahe Met Dagiti Piek" ni Piekpiek, "Bitong Lukalayk Kontes" ni Bitong L. Kontes, "Diables a Sapatos" ni Jajaret Charila, "Ni Gorio ken Dagiti Papaumokda a Bullilising" ni Ruben Kerubin, "Idi Makigasanggasat ni Tiririt, Ti Pilusupo a Dalag - ni Mind Robber, "Bionic, Naikali a Kadkadua ti Kabus" ni Atong Ispoklong, "Alyas Dyak" ni Funny Face, "Umras" ni Bali Sung Song, "Gar (b) age Sale" ni H. rosasinensis, "Congressman Atong Bal" ni Keira, "Anak ti Malas!" ni Napateg A. Linglingay, "Tagiyuot" ni Ambot Paratupot, "Runes" ni Soraya Miguel, "Dagiti Lapped iti Dalan ni Moteo" ni Josh Miel, "Kapitana Essa" ni Aniway C. Amores, "Segunda Mano Met Ngamin" ni Maton Tonton, "Agnakemkan, Lakay" ni Jesse T. Abella, "Wais ti Ribrib" ni Alo K. Oc, "Rikititok" ni Moto R. Olas, ken, "Naspak ti Rayaraya" ni Mr. & Mrs. Suave.
Maidasar dagitoy nangabak a sarita kadagiti agbasbasa tapno pilienda ti mapadayawan iti RFAAFIL 2011 Reader’s Choice Award. Mairakurak dagiti pagannurotan para iti pannakipartisipar iti Reader’s Choice Award iti website a www.rfaafil.com a pagtaengan ti RFAAFIL iti Internet. Agsipud ta maysa laeng ti napadayawan iti 8th RFAAFIL, awan ti mapadayawan a sarita iti 2010 RFAAFIL Reader's Choice Award.
Mapadayawan dagiti nangabak bayat ti maika-43 a Komperensia Nasional ti GUMIL Filipinas iti Cabugao Beach Resort, Pug-os, Cabugao, Ilocos Sur a maangay inton Abril 15-17, 2011.
