Adtoy ti suratmi kadagiti maseknan a hurado iti Salip iti Daniw ti RFAAFIL 2007-2008 a naipatulod babaen ti e-mail kada Ariel S. Tabag, Linda Lingbaoan-Bulong ken Herman G. Tabin. Nalabit nabasa daytoyen a suratmi ngem no bilang saan, patienmi a mabasada daytoy iti pagtaenganmi iti Internet:
Patgenmi a Hurados,
Naimbag nga aldawyo!
Nupay awan ti opisial a protesta, ibilangmi a protesta ti nagbalin a reaksion ni Apo Roy V. Aragon iti pannakaibabawi ti premiona iti pasalip ti Daniw ti RFAAFIL 2008-2009 iti tema ti tao kontra nakaparsuan gapu iti panagbalusingsing a saan a naipastrek ti daniw iti maysa a panid ti papel. Gapu iti pannakaibabawi ti premiona, sinukisokna amin dagiti daniw iti website ti rfaafil ket kinednganna a dagus dagiti daniw a naglabsing met iti bukodna a panagsirig. Saanmi nga anamongan dayta a pangngeddengna. Isu nga adtoy ita nga umaydakayo singaen ta kayatmi a sikayo met laeng ti mangngeddeng kadagitoy daniw nga iprotestana.
Nailanadda iti baba ken nakaatatsda iti daytoy nga e-mail:
1. Barangabang
2. Independencia Y Revolucion
3. Kudos ti Ayatmo iti Bukodtayo a Dila
Kayatmi met a maikkan iti closure daytoyen a problema. Kas kunami, saanmi a pakaragsakan ti agibabawi iti premio ta daytoy la ngarud ti agas ti bannogmi nga agpaspasalip. Ngem no ania ti rumbeng, no ania ti desisionyo a kas hurado, isu ti nasken a masurot.
Urayenmi ti sungbatyo. Dios ti agngina.
'Toy Mangipatpateg,
RFAAFIL
