Patgenmi a Mannurat, dimtengen ti aldaw - Enero 31, 2011 - a panaggibus ti pasalip para iti 9th RFAAFIL. Ngem sakbay a dimteng daytoy a panagtapos ti pasalip, nagdanagkami. Agasem ta nakaguduan ti bulan ti Enero, up-uppat [dua a sarita ken dua a daniw] pay laeng dagiti naisalip.
Makapakatawa a sarita ken daniw a para ubbing ti mapagsasalipan iti maika-9 a tawen a panagpasalip. Narigrigat sa dagitoy a suraten no ikompara iti sabali a klase ti tema wenno suraten a pakisalip. Isu nga adtoy ita nga idanonmi kadakayo amin a nakisalip ti nabara ken nairut a panagyamanmi.
Malaksid kadagiti nakisalip a nagikoreo kadagiti pakisalipda, personal a sinubalitanmi dagiti tunggal e-mailyo a mangipakaammo a naawatmin ti pakisalipyo. No bilang awan naawatyo nga e-mail, saanmi ngarud a naawat ti pakisalipyo. Kadagiti met napatulodanmi iti e-mail, paneknekanyo koma no nairaman met laeng ti pakisalipyo tapno maliklikan ti panagerrado. Usaren ti password nga impatulodmi kadakayo.
Patgenmi a Nakisalip, ikarimi a saanto nga ibunannag ti RFAAFIL ti kinasiasinoyo (malaksid no mangabak ti sinuratyo) ken ikarimi nga aywananmi ti kredibilidad ti pasalipmi iti amin a kabaelanmi. Kayatmi met nga ipakaammo kadakayo amin a nawayakayo nga agsaludsod kadagiti pasamak wenno debelopment ti pasalipmi.
Adun dagiti surat a panangkablaaw kadakami a nakaadayokami kanon. Wen, pudno, nakaadayokamin iti siam (9) a tawen. Ngem iti puso, bagi ken panunotmi, saankami nga immadayo iti kastoy a kaadayo no di gapu kadakayo amin a saan a sumardeng a makitinnaktakunaynay kadakami para iti Literatura Ilokana. Saanmi met a masigurado no agtultuloykami pay wenno saan ta awan kadakami ti kontrol no di ket adda kadakayo, Patgenmi a Nakisalip.
