Kapatgan kadagiti pagannurotan ti RFAAFIL ti naituding a tema wenno mapagsasalipan. Idi irusat ti RFAAFIL ti pasalipna, rinugianna nga inikkan iti pagannurotanna ti tema a suroten dagiti makisalip. Gagangay nga awan tema a mapagsasalipan dagiti nagkauna a pasalip kangrunaanna iti sarita. Kasla saan nga maakseptar idi dagiti makisalip no apay nga adda tema ti pasalip ti RFAAFIL. Mangabaruanan, dayta idi ti pagtaktakderan ti RFAAFIL, ket nasken a suroten dagiti makisalip. Ngem naakseptar met laeng ti kaaduan daytoy a kinaadda ti tema, ta uray dagiti simmaruno a naipasngay a pasalip, nangitudingda metten iti tema a masurot.
Iti panirigan ti RFAAFIL, nalaklaka a mapagdadasig dagiti hurado ti naisalip a sinurat no agpapadada iti trinatar a tema wenno klase ti mapagsasalipan.
No dadduma, dandani mapattog amin dagiti naisalip gapu iti panaglabsing iti tema wenno awan nakapatar wenno nakasurot iti naidiaya a suraten kas kadagiti napalabas a pasalip ti RFAAFIL nangruna iti benneg ti sarita. Mababalaw kadi ti RFAAFIL gapu iti pannakaisangrat ti tema a mapagsasalipan? Saan kadi a nalaklaka pay ketdi koma ken ni mannurat ti agsurat ta saanna a sapulenen ti klase wenno tema ti suratenna?
"Ania pay ngarud ti serserbi ti pagannurotan no saan met a masurot?" kuna idi ti maysa a pinaghuradomi.
Iti tinawen a kinaadda ti tema wenno kita ti mapagsasalipan, naadaptar ngata metten daytoy dagiti makisalsalip. Ita a maika-9 a tawen ti RFAAFIL, makapakatawa a sarita ti mapagsasalipan iti benneg ti sarita idinto a daniw a para ubbing manipud iti Prep agingga iti Grado Tress met iti benneg ti daniw.
Iti biang ti sarita, awan ngata metten argumento iti tema a makapakatawa. Nakaaawaten dayta. Ngem ketdi, narigat ti agpakatawa. Mabilbilang dagiti mannurat a nalaing nga agsurat iti kakastoy a sarita. Maysa daytoy a gapu no apay a saan nga inaramat a dagus daytoy ti RFAAFIL kadagiti immun-una a pasalipna.
Iti biang met ti daniw, a para ubbing, nakaaawat dayta a pagalagadan. No para ubbing, kunatayo, Prep agingga iti Grade III. Ti panagawat ti RFAAFIL iti daytoy a pagannurotanna ket saan a daniw a mairuknoy wenno maisagut kadagiti ubbing iti kasta nga edad no di ket daniw dagitoy a naisangrat a basaen, kabesaen wenno daniwen dagiti ubbing iti kasta nga edad. Saan a daniw a pang-Grade 6 wenno panghaiskul a saanen a magaw-at dagiti pang-Grade 3.
"Adu dagiti nabasbasa ken malaglagipko a dandaniw a para ubbing. Kas koma iti: Idi ubingak a bassit / Innalanak ti ansisit / Napannak inlagidlagid / Iti lelennekan ti init." kuna ti agdama a hurado iti daniw ti 9th RFAAFIL.
Iti duapulo ket pito (27) a naisalip a makapakatawa a sarita iti Salip iti Sarita ti 9th RFAAFIL, mano kadakuada ti makabael a mangpakatawa iti agbasbasana?
Nupay sangapulo ket pito (17) laeng dagiti daniw a naisalip iti Salip iti Daniw ti 9th RFAAFIL, mano kadakuada ti nakapasa iti pagannurotan a nasken a ti daniw ket agpaay kadagiti ubbing iti naagapad nga edad?
Impakaammo ti RFAAFIL iti nabiit babaen ti Twitter accountna nga ibasanto dagiti mapili nga ub-ubbing dagiti mangabak a daniw iti 9th RFAAFIL iti pannakaselebrar ti tinawen a kombension ti GUMIL Filipinas inton Abril 2011. Ti RFAAFIL, babaen ti proyektona nga ANAK a supsuportaran dagiti naayat nga esponsor, ti makaammo iti libre a panagparehistro dagitoy nga ubbing iti nasao a kombension.
