Patgenmi a Nakisalip,
Pagyamanandaka iti daytoy suratmo, a naipaskilen iti E-lokano Mail #308, maipanggep iti saludsodmo no apay a maysa laeng ti napadayawan a sarita iti 8th RFAAFIL. Pagyamanandaka metten iti ayatmo a nakisalip iti pasalipmi.
Adtoy nga ibinsabinsami kenka no ania ti makunami kadagiti saludsodmo. Umuna unay, awan ti karbenganmi a makibiang iti desision dagiti hurado. Kayatmi man nga ited dagiti gunggona a nailanad iti pagannurotanmi, awan maaramidanmi. Ania ngarud no daytoy laeng ti maikari a mapadayawan? kuna dagiti naghurado. Daytoy a situasion ket saanen a nakakaskasdaaw iti pasalipmi. Iti salip ti sarita iti tema a panagsakripisio iti 2nd RFAAFIL, naksayan dagiti napadayawan iti lima. Sangapulo koma ngem nagtinnag a lima. Iti salip ti daniw iti tema ti tao kontra nakaparsuaan iti 7th RFAAFIL, naksayan manen dagiti napadayawan iti dua. Sa ita, iti salip ti sarita iti 8th RFAAFIL naksayan iti uppat. Lima koma ngem nagtinnag a maysa.
Iti daytoy a pasamak, nupay adda koma met labanmi a mangkontra iti desision dagiti hurado, nakapsut unay no ipettengmi ti pannakaited amin dagiti pammadayaw ta awan met nabalusingsing a pagannurotan. Iti pagannurotan Bilang 8, nadakamat a mabalin a manayonan wenno maksayan dagiti gunggona depende iti pangngeddeng dagiti hurado. Saan koma a maupay dagiti makisalip iti daytoy a pasamak ta mabalin met a manayonan dagiti mapadayawan. Igaed koma a papintasen dagiti makisalip ti sarita wenno daniwda tapno umadu dagiti mapadayawan. Saan laeng a lima ngem ad-adu pay ngem iti lima.
Ket wen, Patgenmi a Nakisalip, maawatanmi unay dagiti argumento nga imbagam iti suratmo. Saan met a basta lattan inawatmi wenno inaklonmi a dagus ti desision dagiti hurado a maysa laeng ti mapadayawan a sarita. Adu met dagiti saludsod nga imbakalmi kadagiti hurado. Maysa pay, saanmi a maaklon a kimmapuy dagiti mannurat a nagputar kadagiti insalipda. Nalabit, nalipatan sa dagiti nakisalip, a pakaibilangam, no ania ti mapagsasalipan a kas kuna dagiti hurado.
Kuna dagiti hurado: "Ti kangrunaan a rason ket nalipatan sa dagiti nakisalip no ania ti kayat a sawen ti fantasy story. No nalipatandan, nagsukisokda koma. Iti sabali a pannao, iti pay laeng pagalagadan ti pasalip, nagkibbatoldan. Uray pay ket ngata makatakder a kas sarita ti naisalip no dina met sinurot ti pagalagadan, siempre, dayta ti pakatinnagan ti sarita."
"Adda pay sarita a naisalip a naisalip met iti sabali pay a salip iti sarita (para iti tawen 2009-2010 met laeng). Ti naaramid, natinnag daytoy a sarita nupay adda koma tiansana a mangabak. Adda met ketdi sarita a naisalip a makuna a pantasia ngem nagpatingga laeng dita - ta no koma maysa a potahe daytoy a naidasar, rinamanan la bassit dagiti hurado, ammodan a makadadael laeng iti ganas a mangan; kinaykayatdan ti solo innapuy," kinuna pay dagiti hurado.
Ti pagawatanmi iti kuna dagiti hurado nga: "Adda pay sarita a naisalip iti sabali pay a salip iti sarita (para iti tawen 2009-2010 met laeng)" ket kastoy man. Ti sarita a naisalip iti RFAAFIL ket isu met laeng ti sarita a naisalip iti sabali a pasalip iti pareho a tawen (2009-2010). Di pay ket no mangabak iti RFAAFIL daytoy a sarita ken mangabak pay iti bangir a pasalip, dakkel a parikut no kua daytan. No apay a naduktalan daytoy ket gapu ta hurado pay daytoy a huradomi iti sabali a pasalip.
Ti maysa laeng a sarita a napadayawan iti salip ti sarita ket saan a nagdepende iti no mano ti bilang dagiti naisalip ngem ketdi nagdepende iti kalidad dagiti sinurat. Kasungani iti pasalip ti daniw. Basbassit nga amang ti bilang dagiti naisalip a daniw ngem kompleto ketdi ti bilang dagiti napadayawan a daniw.
Gapu iti daytoy a pasamak iti pasalipmi, dumegdeg ti reggetmi a mangsurot iti nabayagen a naisingasing kadakami - ti "Sponsor's Choice." Daytoy ket pammadayawmi iti sarita a magustuanmi a kas esponsor. Naisingasing daytoy "Sponsor's Choice" iti naminsan agsipud ta kanayonkami a maus-usig nga adda pasetmi iti pannakapili dagiti mapadpadayawan a sarita ken daniw. Kuna ti singasing a daytoy a pammadayaw nga aggapu kadakami ket sebsebanna dayta a pannakausig. Ngem ala, pagyamananmi unay, ta dagiti pasamak iti RFAAFIL ket tinulongannakami a mangdepensa iti bagimi nga iti kaano man, saankami pulos a nakibiang iti pannakapili dagiti mapadayawan iti pasalipmi ta dayta ti pudno. Natarnaw ti konsensiami. Naisingasing pay daytoy a pammadayaw tapno adda rason ken nawayakami kano a mangi-blog iti paliiwmi kadagiti naisalip bayat ti panaguray iti resulta ti pasalip. Nawaya pay a pagpampanunotanmi no iwayatmi daytoy a pammadayaw iti umuna a dekadami (sangapulo a tawen) nga agpaspasalip.
Ala, Patgenmi a Nakisalip, sapay koma ta nalawlawagandaka iti daytoy a sungbatmi. Sapay koma ta makisalipkanto manen. Namnamaem nga aywananmi ti dignidad ti pasalip ken kangrunaanna ti dayawmo a mannurat. Agtalinaedto latta a silulukat ti RFAAFIL kadagiti suhestion wenno mensahe nga aggapu kenka, kadagiti mannurat ken naayat nga agbasbasa.
Naimbag nga aldawmo!
'Toy Mangipatpateg,
RFAAFIL
