Ni Juan Al. Asuncion ti nakaala iti kangatuan a puntos, walo iti sangapulo a saludsod, iti RFAAFIL Trivia Contest a naisayangkat iti Maika-45 nga Anibersario ken Christmas Party ti Gumil Metro Manila.
Dagiti dadduma pay a nangabak ken dagiti naalada a puntos:
2. Cles Rambaud = 7 a puntos
3. Leo Fagaragan = 7 a puntos
4. Sherma Benosa = 4 a puntos
5. Eden Bulong = 4 a puntos
Dagiti Premio: 1st – P1,200.00, 2nd – P1,000.00, 3rd – P800.00, 4th – P500.00 ken 5th – P500.00 a gatad ti SM gift certificate.
Naibunong dagiti test papers kadagiti partisipante. Nupay awan iti pagannurotan ti pa-Trivia, inwaragawag ni Apo Tabag a mabalin ti agkopia wenno agsakar iti sungbat iti kaabayna a nagraragsakan dagiti nakipartisipar. Ti adatna, nasken a siguraduen no husto ti sungbat a sakaren. Adda pay daydiay kasla kulibangbang a nagakar-akar tapno agkopia laeng ti isungbatna. Daydiay nagakar-akar ket awan man la nabanniitanna a gunggona. Pasig kano amin a biddut dagiti sinakarna.
"Nakaay-ayat man unay," nakuna ti maysa a nakipartisipar. "Nagballigi ti RFAAFIL a nangted iti pagraragsakan ken linglingay iti dayta a pasken. Nasayaat no maisayangkat met daytoy iti kombension ti GF tapno adda pangbalanse iti kinaserioso ti pasken."
Iti sabali a bangir, idanonmi ti napalaus a panagyamanmi ken ni Ariel S. Tabag iti panangiwayatna daytoy umuna a pa-Trivia ti RFAAFIL iti nasao a pasken ti GMM. Utangmi a dakkel kenkuana ti naimballigian a pa-Trivia.
Dagiti naited a Trivia Questions:
1. Ania ti paulo ti kanta a nailaga iti “Kanta iti Sab-ok ti Agpakadan a Malen” a sarita ni Agustin DC. Rubin a kaunaan a napadayawan iti RFAAFIL Reader’s Choice Award? [CLUE: Nasaem, naut-ot la unay.] SUNGBAT:__________________________
2. Iti pasalip ti RFAAFIL iti tao ken ayup, lima dagiti napadayawan a sarita a nangtratar iti tao ken aso, pusa, nuang, kabalio ken ania nga ayup? [CLUE: Adda laeng iti asideg nga aglawlawmo daytoy nga ayup.] SUNGBAT:_____________________
3. “Ken ni Pidut: Dagiti Daton iti Angep” a sarita ni Joel B. Manuel ti nangyalat iti Umuna a Gunggona iti 6th RFAAFIL. Ania nga ayup ni Pidut? [CLUE: Adda kadagiti naagapad nga ayup iti Saludsod No 2.] SUNGBAT:_____________________
4. True or False: “Ti Pusak a Gusing” a napadayawan a daniw ni Derick Marcel F. Yabes ket naisalip iti tema maipanggep iti tao ken ayup. [CLUE: Naibasa ti daniw iti kallabes a GF Convention.] SUNGBAT:________________
5. No tao koma a nayanak ti RFAAFIL, mano itan ti tawenna? [CLUE: Sukainan ti sungbat iti program.] SUNGBAT:________________
6. Lima iti sarita ken lima met iti daniw dagiti mapadpadayawan iti tinawen a pasalip. Mano amin ti bilang dagiti napadayawan iti 9th RFAAFIL? [CLUE: Nakurang a lima iti sarita, nasurok a lima iti daniw.] SUNGBAT:________________
7. Ti proyekto nga A.N.A.K. [Addang Nga Agayab Kamannurat: Awis Nga Agpaay Kailokuan] ket panangesponsor kadagiti agdadamo a mannurat tapno maikkanda iti libre a panagparehistro iti kombension nasional ti GUMIL Filipinas tapno umadu dagiti mannurat a mangpadur-as iti Literatura Ilokana. Ania a tawen a nayanak dagiti umuna nga A.N.A.K. ti RFAAFIL? a.) 2003 b.) 2004 k.) 2005 d.) 2006 e.) 2007 g.) 2008 SUNGBAT:________________
8. Ti RFAAFIL ti nangirusat iti tema kadagiti pasalip iti sarita iti Iluko. Ania kadagitoy a tema ti saan pay a naaramat iti pasalipna: Maipanggep iti pamilia, panaggayyem, panagsakripisio, panagdappat, tao ken ayup, tao kontra nakaparsuaan, ayat, makapakatawa, sarita a para ubbing ken makapasangit a sarita? SUNGBAT:_____________________________________________________________
9. Asino ti kaunaan a mannurat a nangabak iti Umuna a Gunggona iti pasalip ken napadayawan pay iti RFAAFIL Reader’s Choice Award? [CLUE: 2 syllables ti apeliedo ti autor, kas koma T a b a g.] SUNGBAT:__________________________________________
10. Sapulem ti kulluong iti burayok ti puso.../ Sarukangam ti taeng iti kappia ti kaunggan.../ Itukitmo ti bin-i iti kapanagan ti isip.../ Kulluong... Taeng... Bin-i.../ Dagitoy ti aweng idiay Belen - /Pagubbogem 'ta biag ket ililinakanto ti samiweng! Ania ti tema a napagsasalipan kadaytoy daniw a nangabakan ni Jobert N. Pacnis? SUNGBAT:_______________________
