Nayanak ti RFAAFIL Pulse iti Facebook tapno umasideg kadagiti amin nga Ilokano ken amin a mangipateg iti pagsasao nga Iluko. Ti mangitandudo iti pagsasao ti kangrunaan a gagemmi. Makunami ita a nagballigikami, uray no kaskasano, iti daytoy a panggep ta makitami itan ti resultana. Agsasarunon dagiti LIKEs, private messages, comments ken pannakabisita ti RFAAFIL iti Facebook nga aggapu iti nadumaduma a lugar.
Adtoy a sungbatanmi ita dagiti nagipatulod kadagiti pakaseknanda iti daytoy pasalipmi iti Facebook.
SALUDSOD: Dua ti pakakitaak a nakaikabilan ti daniwko iti RFAAFIL Pulse, kasano a masiguradok a maibilang dagiti LIKE nga agpaay iti daniwko?
SUNGBAT TI RFAAFIL. Wen, mamindua nga ipaskilmi dagiti daniw iti lakub ti Facebook ti RFAAFIL – (1) iti Wall ti RFAAFIL Pulse ken (2) iti page ti RFAAFIL Pulse. No i-friend-search-mo ti RFAAFIL iti EVERYONE, masarakam ti Wall ti RFAAFIL Pulse ket no iti PAGE, masarakam met ti RFAAFIL Pulse page. Ladawan ti ubing ti adda a profile ti Wall ti RFAAFIL Pulse idinto a ladawan ti nakapampen a kayak ti profile picture ti RFAAFIL Pulse page. [Birbiroken ti RFAAFIL ti agbalin nga opisial a logona. Mai-launch daytoy iti RFAAFIL @ 10 celebration.] Agpada a mabilang dagiti LIKE a naited iti daniw iti Wall ti RFAAFIL Pulse ken iti RFAAFIL Pulse page. No bilang saan a makita ti daniw a kayat nga i-Like, nasaysayaat no bisitaen ti www.rfaafil.com ta naipaskil amin dita dagiti daniw ket i-klik laengen ti link ti daniw nga agturong iti facebook ti RFAAFIL.
[No i-search laeng ti RFAAFIL iti Pages search, rummuar ti RFAAFIL Pulse (opisial) ken RFAAFIL (manglimlimo). Saanmi a pinarnuay daytoy naud-udi a page – RFAAFIL (manglimlimo). Maysa daytoy a bogus ken mangdadael ti panggepna. Agannad. RFAAFIL Pulse ti opisial a nagan ti page ti RFAAFIL iti Facebook. Patgenmi a gayyem a nangparnuay daytoy a page, pangngaasim ta ikkatem koma bassit.]
PALIIW: Nalawag a makita a saanen a pinnintasan ti daniw ti laban kadagiti entry a daniw no di ketdi pinnaadduanen iti gayyem ti laban. Kasla sinerreken ti politika ti nasao a pasalip ta adda pay ketdin dagitay contestants a mangikamkampania iti entry-da iti ruar ken iti ikub ti facebook account ti RFAAFIL tapno makaguyogoyda iti adu a botos wenno like. Kasta met nga adda payen campaign manager dagiti sumagmamano a contestants a mangikamkampania iti pannakai-LIKE dagiti entrida.
MAKUNA TI RFAAFIL: Ti RFAAFIL Reader’s Choice Award ket pammadayaw iti daniw a makagun-od iti adu a Like. Para iti daniw a magustuan dagiti readers. Gagangay a daytoy ket nakabase iti bukod a panagraman dagiti readers. Talaga a popularity daytoy. [Ti nagdumaanna iti regular a Reader’s Choice ti RFAAFIL ket libre dagiti maidatag a vote]. Isu a nawaya dagiti agLIKE ditoy Facebook ta libre dagiti maited a botos. Nawaya pay dagiti komento a maidatag. No agala man ti dadduma a contestants iti mangikampania iti daniwda, nasayaat latta. Maibalakad met ngarud kadagiti amin a makisalip ken nakisalip nga ikampaniada met ti daniwda. No maikamkampania man dagiti daniw, napintas la unay ta maikamkampania met no kua ti kinaIlokanotayo. Mairiing ken maipasagepsep ti kinaIlokano kadagiti Ilokano. Ti RFAAFIL Reader’s Choice Award ket maysa (1) laeng a pammadayaw iti daniw a popular (ammomi dayta), adda pay lima (5) a pammadayaw iti daniw a napintas uray no saan a nalatak.
SALUDSOD: Saan ngata a mapukaw ti panagpapatas a pannakatrato dagiti daniw agsipud ta adda immun-una ken maud-udi a naipaskil iti Facebook Wall ti RFAAFIL? Saan kadi koma a namaymayat no naggigiddanda amin a naipaskil?
SUNGBAT TI RFAAFIL: Daytoy a saludsod para iti panagpapatas ket maipanggep laeng iti pammadayaw para iti Reader’s Choice. Napaneknekan metten nga uray ti maudi a maipaskil, adda tsansa a kumamat iti adu a LIKE. Dagiti maudi nga agisubmitir iti daniwda (no adda pay J) ket maikkanda met iti panawen a maiLIKE ti daniwda. Mabalin a maysa a bulan (kas kaykayat ti kaaduan) wenno dua a bulan kalpasan nga agserra ti pasalip. Amin dagiti daniw ket aggigiddan a maiyawat kadagiti hurado iti pannakapilida. Awan ti umun-una ken awan ti maud-udi. Napateg unay a naipaskil a dagus dagiti daniw iti Wallmi tapno makita nga adda daytoy a pasalip. Patienmi a naatrakar dagiti dadduma a nakisalip agsipud ta adda nakitada a daniw a naipaskilen. Lugayanmi ngarud dagiti 16en a daniw a naisalip ken kadagiti mannurat a natured a maipaskil a dagus ti daniwda. Naturedkami met a nangikabil iti pagannurotan a maipaskil a dagus dagitoy a daniw agsipud ta agpaay laeng ti daniw para iti RFAAFIL. Saannan a maaramat dayta nga isalip iti sabali. Daytoyen ti panangpagusto iti singasing kadakami iti naminsan a maidasar kano koma amin dagiti maisalsalip iti pasalipmi.
SINGASING: Inton marikpan ti panagawatyo iti entry ket maiyaplagto dita wall ti RFAAFIL dagiti amin nga entry, ditanto la koman a mapasamak ti usto a panagbobotos. Maisubli iti “zero” ti amin a botos ket yuray dagiti readers ti pannakaiposte dagiti amin a daniw sadanto mapalubosan nga agbotos tapno makuna a “fair” ti laban. Dagiti laeng koma lehitimo a friends ti RFAAFIL ti mapalubosan nga agbotos tapno maliklikan ti sao-sao a nangabak ni kastoy gapu ta binunagna ngamin a nag-LIKE dagiti adu a gagayyemna. Kangrunaanna, maibalakad a kabayatan iti “voting period”, saan koma pay nga agaw-awat ti RFAAFIL kadagiti mayat nga agbalin a “new friend”-na tapno maliklikan ti panagipastrek dagiti contestant kadagitay gagayyem wenno kagrupoda nga agpangpanggep a tumulong iti “entry” ti gayyemda.
MAKUNA TI RFAAFIL: Daytoy a pasalip ket naiwayat kas paset ti masungad a pannakaselebrar ti Maika-10 a Tawen ti RFAAFIL. Selebrasion ken panagyaman daytoy ti RFAAFIL. Panangrambak ti gapuna daytoy a pasalip. Panagkitami, malimitaran ti panggepmi no kastoy ti aramidenmi. Idi damo, talaga nga arisitenmi dagiti akseptarenmi a “friend” ti RFAAFIL iti facebook, nangruna dagiti kasla nakalinged iti alias, ngem nagbaliw dayta gapu ta ad-adda a kayatmi a maiwaragawag ti literaturatayo. Saludsodenmi ita ti bagimi, ania ngarud koma ti kriteriami iti kunayo a lehitimo a friends ti RFAAFIL? Narigat nga ilistami. Ibilangmi ketdi amin a gagayyem dagiti umuneg ti facebookmi. No adda man nakamaskara a makigayyem, saanto nga aglemmeng ti RFAAFIL ket ibagana nga Ilokano. Patienmi a “fair” latta ti laban para iti Reader’s Choice ta nakadasar amin dagiti daniw kadagiti amin a nakaisalipen, makisalip ken agbasbasa. Maibalakad ketdi kadagiti dadduma a nakisalip nga i-share-da met ti daniwda tapno maiyallatiw ti kinaIlokanotayo.
SALUDSOD: Ania ti RFAAFIL?
SUNGBAT TI RFAAFIL: Ti RFAAFIL ket RFAAF(IL). Iluko Literature. Gannuat a mapabaknang ti Literatura Ilokana. Panagayatmi iti kinaIlokanomi. Agyamankami kadagiti papagayam a mangted iti kanito a mangilawlawag no ania ti RFAAFIL. Saan koma a liplipatan a dakamaten a daytoy ket maysa nga sponsorship para iti panangpasantak ti Literatura Ilokana.
PALIIW: Adayon iti nangitarayan iti Like dagiti dadduma a daniw kadagiti kalabanda. Adda napintas, medio napintas ken adda nakusel a daniw. Ipalubosyo kadi a mangabak ti nakusel a daniw gapu laeng ta adu ti nagLike wenno ti daniw ti contestant nga adu ti gagayyemna a nagLike? Napimpintas no mangabak met laeng ti napintas a daniw.
SUNGBAT TI RFAAFIL: Isublik kenka, Patgenmi a Reader, daytoy a saludsodmo. Itulokmo kadi wenno buyaem latta kadin a mangabak ti kunam a nakusel a daniw? Apay a dimo ikampania met ti daniw nga iti panagkitam ket napintas. Ulitenmi, manen a maysa laeng ti daniw a mapadayawan (iti Reader’s Choice) ket daytoy ti daniw a makagun-od iti adu a LIKE. Addan dagiti daniw a naka-score iti 800 a LIKEs. Iti biang ti RFAAFIL, maragsakan unay. Maragsakankami para iti Literatura Ilokana. Maragsakankami uray adda 400 laeng, kadagiti 800 a nagLike iti dayta maysa a daniw, ti nangbasa iti dayta Ilokano a daniw. Iti kasta, mairakurak ti lengguahetayo nga Ilokano. Mano itan dagiti kadaraantayo ti saanen nga agbasbasa iti Iluko? Nalabit adu.
Naimballigian daytoy panidmi ditoy Facebook gapu met laeng iti pannakitinnakunaynayyo nga agbasbasa. Kadagiti mensahe a pangkablaaw ken pangpatibker a maaw-awatmi, agyamankami unay. Sapay koma ta nasungbatanmi amin dagiti pakaseknan nga imposteyo iti inboxmi. Pasensiakayon no naaramatmi dagiti dadduma nga impaskil ditoy tapno mabasa met ti publiko. Sige, tira, LIKE!
[TRIVIA: Top 10 a nasion a paggapuan dagiti bumisbisita iti Facebook ti RFAAFIL: Philippines, US, Saudi Arabia, HongKong, Singapore, UAE, Canada, Spain, Kuwait and Italy.]
