RFAAFIL

Panangipateg iti pagsasao nga Iluko ken panangimutektek nga awanen kasam-itan a denggen, baliksen, basaen ken suraten no di ti pagsasao a nariingan, ti gapuna a naipasngay ti RFAAFIL [Reynald F. Antonio Awards for Iluko Literature].

Kangrunaan a gandat ti RFAAFIL ti mangpadayaw kadagiti de-kalidad a sinurat tapno mataginayon ti pannakaputar dagitoy para kadagiti annak ni saluyot ken para iti literatura ita ken iti masakbayan. Nabukel met ti www.rfaafil.com a website kas opisial a pagtaengan ti RFAAFIL iti Internet. Iti aldaw ti Mayo 19, 2002 nga immuna a timmayab iti law-ang daytoy a website tapno dumanon kadagiti Ilokano iti amin a paset ti lubong.

Iti pakasaritaan ti Literatura ni Ilokano, ti RFAAFIL ti umuna a pasalip iti tay-ak ti panagsuratan nga agusar wenno agaramat babaen ti Internet. Mangipaneknek a sumursurot met ti kultura ni Ilokano iti panagdur-as ti panawen.

Narugian ti RFAAFIL Reader's Choice Award iti tawen 2003 para kadagiti readers. Pammadayaw dagiti agbasbasa ken ni mannurat a magustuanda ti sinuratna ken gundawayda metten a tumulong ken makipagmuli iti literatura. Panagtultuloy a pannakaputar dagiti de-kalidad a sinurat ken panagrang-ay ni mannurat, ti GUMIL ken ti Literatura Ilokana ti panggep a ragpaten daytoy nga award.

Narugian idi 2005 ti A.N.A.K. (Addang Nga Agayab Kamannurat, Awis Nga Agpaay Kailokuan) ti RFAAFIL. Ti sertipiko ti A.N.A.K. ket maipaay ken ni agdadamo a mannurat. Ti A.N.A.K. ket isu ti tinawen a panagesponsor kadagiti agdadamo a mannurat tapno maikkanda iti libre a panagatendar (panagparehistro) iti kombension ti GUMIL Filipinas tapno umadu dagiti agbalin a mannurat a mangbiag iti lenguahetayo nga Ilokano. Dagiti agdadamo a mannurat ita, isudanto ti namnama para iti naraniag a masakbayan ti literaturatayo.

No adda dagiti nasken nga iyuman, iturong iti  admin@rfaafil.com wenno iti  rfaafil@hotmail.com wenno isurat laeng iti E-lokano Mail a masarakan a mismo ditoy website.

Pammadayaw dagiti agbasbasa iti gapuanan ni mannurat. Makipartisipar ditoy!

No adda mensahe nga ipatulod kadakami, sumrek ditoy.