|
1. Saan nga agsasarak iti personal dagiti tallo a hurado. Saan a maibutaktak ti kinasiasinoda agingga iti aldaw a mapadayawan dagiti mangabak iti pasalip.
2. Maikkan dagiti hurado ti usarenda a parbo a nagan: Hurado Uno, Hurado Dos ken Hurado Tres. Saan ngarud a gamden a takuaten ni hurado no asino dagiti kaduana a hurado wenno ibagana ti takemna wenno kinasiasinona iti sabali. No adda iposte iti forum, nasken nga usarenna ti naited a parbo a naganna. No met agpatulod iti e-mail ti RFAAFIL a mismo, nasken a dakamatenna ti parbo a naganna.
3. Magraduan (a kangatuan ti 100% ket kababaan ti 0%) dagiti sarita a maisalip babaen ti kriteria iti baba:
45% - ti porma, teknik, pannakasangal ti sarita ken no kasano ti panangipresenta ti autor iti bukodna a sarita a maibatay iti balabala wenno plot structure.
40% - ti naguneg, linaon, ramen wenno subject matter a buklen ti mensahe, tema (a nasken a panagsakripisio), character, setting, ken dadduma pay, ken
15% - ti kinaidumduma ken kinaisangsangayan ti sarita a mangted iti nauneg a kapanunotan ken impression iti agbasbasa (novelty).
4. Ipatulod dagiti grado babaen ti e-mail. Usaren ti E-lokano Mail wenno ipatulod iti rfaafil@hotmail.com.
5. Mamitlo nga aggrado dagiti hurado:
Umuna - magraduan amin dagiti sarita. Isubmitir dagiti grado iti di naladladaw ngem Pebrero 28, 2004. Maipaskil dagiti grado iti panid ti FIRST GRADING tapno mapagdadasig dagitoy iti kada sarita ken iti kada hurado. Ti RFAAFIL ti mangtally kadagiti grado santo maipaskil dagiti sangapulo ket lima a kangatuan iti panid ti TOP 15.
No adda dagiti opinion para iti pagpigsaan wenno pagkapsutan ti maysa a sarita a kayat nga iburay ni hurado, ipaskilna laeng iti forum tapno mabasa ti kaduana a hurado.
Maikadua - magraduan laengen dagiti sarita iti TOP 15. Isubmitir dagiti grado iti di naladladaw ngem Marso 6, 2004. Maipaskil dagitoy iti panid ti SECOND GRADING. Ti manen RFAAFIL ti mangtally ket maiposte ti resulta dagiti sangapulo a kangatuan iti panid ti TOP 10.
Sakbay ti maikatlo a panaggrado, maaramid ti deliberation iti forum. Nasken a mangted ti kada hurado iti kritika wenno paniriganna, ababa man wenno atiddog, iti tunggal maysa kadagiti TOP 10 a sarita.
Maikatlo - magraduan laengen dagiti sarita iti TOP 10. Idatag dagiti grado iti di naladladaw ngem Marso 15, 2004. Maipaskil dagitoy iti panid ti FINAL GRADING. Ti manen RFAAFIL ti mangtally ket maiposte ti resulta dagiti lima a kangatuan iti panid ti TOP 5. Dagiti saan a sumrek iti TOP 5 a sarita ket marangkoda base iti naudi a gradoda.
6. Kalpasan ti umuna, maikadua ken maikatlo a panaggrado, irangko dagiti hurado no asino kadagiti TOP 5 a sarita ti mangabak iti umuna, maikadua, maikatlo, maikapat ken maikalima a pammadayaw. Nasken a mai-e-mail iti kabiitan a panawen kalpasan ti Marso 15, 2004. Maimalditto ti resulta iti panid ti RANKING.
7. No adda dagiti agpada wenno agtabla iti grado iti panagtally ti RFAAFIL wenno bambanag a nasken a maresolbaan, dagiti met laeng hurado ti mangngeddeng ken mangdesision.
| 
