|
Panagraem, panagtalek, integridad, kualipikasion ken dagiti rekomendasion ti publiko ken ni hurado dagiti kangrunaan a nagbatayan ti RFAAFIL a nagpili kadagiti aghurado iti pasalip iti tawen 2003-2004. Nalaka laeng koma nga itudo no asino ti dutokan nga aghurado ngem napanunot ketdi a nasayaat met no dawaten ti kapanunotan ti kaadduan. Napateg met nga ipulsuan ti kayat ti publiko.
Kas iti napalabas a pasalip ti RFAAFIL ken kas iti nakairuamanen a mapaspasamak iti panagpili kadagiti mapadayawan a sarita iti literatura ni Ilokano, agsasarak dagiti hurado iti personal ket maaramid ti deliberation. Ita, padasen ti RFAAFIL nga isayangkat ti maysa a baro a wagas iti panagpili a maigiddiat iti nakaisigudan, saan nga agkikita dagiti hurado iti personal ngem ketdi agsasarakda iti www.rfaafil.com a pagtaengan ti RFAAFIL iti internet.
Maikkan dagiti hurado iti parbo a nagan wenno username nga usarenda iti panawen ti panagpili. Mailemmeng ti kinasiasinoda tapno nawayada a mangipeksa kadagiti paniriganda. Nawaya, saan a gapu ta agamakda a mangiburay kadagiti pagkapsutan ti maysa a sarita no di ket, tapno maliklikan ti impluensia iti nagbabaetanda. Iti panaggrado ken panagranggo, nawayada a sumurot gapu iti puntos ti sarita a maidatag a saan ket a sumursurot laeng gapu iti panagbain iti in-inauna wenno ad-adut' kapadasannan a hurado no agsasangoda koma iti personal.
Iti pannakailinged pay laeng ti kinasiasinoda a hurado, maliklikan no kua dagiti sayangguseng, palakasan, paboritismo, paripirip, impluensia ken dadduma pay a bambanag a maparnuay iti panawen ti panagpili ken panagrangkingda kadagiti sarita a mabalin a mangmansa iti panagtakemda a kas hurado.
Iti pakasaritaan ti Iluko Literature, ti RFAAFIL ti umuna a pasalip iti tay-ak ti panagsuratan nga agusar wenno agaramat babaen ti internet. Daytoy a wagas ket agpaay a gundaway kadagiti mannurat a makabael nga aghurado nga adda iti adayo a lugar wenno awan tiempona iti maituyang a panagsasarak iti personal. Ti panaginternet ni hurado ket wayawayana a mangusar iti libre nga orasna tapno maipatungpalna ti naited nga akemna. Wayawaya ti pasalip tapno mapagtutugmokna dagiti pilina a hurado iti maymaysa ngem nawada a panawen.
| 
