RFAAFIL

Makipartisipar! Ibutos ti sinurat a magustuan iti RFAAFIL 2011 Reader's Choice Award. Sumrek ditoy.

PAMMADAYAW iti sarita ken daniw a magustuan dagiti agbasbasa iti bukodda a panagraman. Adu dagiti Ilokano a nupay saanda a mannurat ket mabalinda met ti tumulong a mangpasantak iti pagsasao a nariinganda a saan laeng a gagangay nga agbasa ken maliwliwa. Dagiti readers ti gapuna no apay a narugian daytoy nga award. Adtoy ti resulta ken dadduma pay a pasamak iti Reader's Choice Award babaen ti pannakipartisipar dagiti agbasbasa.

Narugian ti RFAAFIL Reader's Choice Award iti tawen 2003 para kadagiti readers. Napadayawan ti sarita a "Kanta iti Sab-ok ti Agpakadan a Malem" a gapuanan ni Agustin DC. Rubin. Simmaruno ti "Maysa a Linabag ti Biag ni Segundina de Dios" a sarita ni Francisco T. Ponce idi 2004, ti "Dagiti Proberbio iti Biag ni Maestro Modesto" a sarita ni Joel B. Manuel ken ti "Sagidek Latta ti Kiday, www.rfaafil.com" a daniw ni Dexter M. Fabito idi 2005, ti "Maysa a Rabii iti Sirok ti Daldaligan" a sarita manen ni Joel B. Manuel ken ti "Naukrad a Dakulap" a daniw ni Agustin DC. Rubin idi 2006.

Ti "Basikaw, Pagutpot, Sukdip" a sarita ni Jaime G. Raras ken ti "Sapulem ti Kulluong" a daniw ni Jobert M. Pacnis idi 2007, ti Ken ni "Pidut: Dagiti Daton iti Angep" a sarita ni Joel B. Manuel ken ti "Taguob" a daniw ni Giovanni L. Palomares idi 2008, ti "Ni Kanor ken Siak iti Taaw" a sarita ni Danilo B. Antalan ken ti "Mariknak ti Saem Dagiti Agarubos a Luam, Nanangko!" a daniw ni Agustin DC. Rubin idi 2009.

Awan ti napadayawan iti sarita idinto a ti "Rissik ti Panunot, Kannawidan Rumasuk" a daniw ni Agustin DC. Rubin idi 2010.

Dagiti mapili a sarita ken daniw iti tinawen a pasalip ti RFAAFIL ti maidasar kadagiti agbasbasa tapno pilienda ti magustuanda. Makipartisipar iti daytoy a proyekto.

Panagtultuloy a pannakaputar dagiti dekalidad a sinurat ken panagrang-ay ni mannurat, ti GUMIL ken ti Literatura Ilokana ti panggep a ragpaten ti RFAAFIL Reader's Choice Award babaen ti ayat ken tulong dagiti rinibribu nga agbasbasa iti amin a paset ti lubong. Dagiti agbasbasa ti kangrunaan a mangbibiag kadagiti sinurat. Dakkel ti akemda a mangpadur-as iti Literatura Ilokana.