Pebrero 1, 2005

Apo Hurado,

Idanonmi ti nabara a kablaawmi kenka iti isasangbaymo ditoy lugar nga insaganami iti pannakapili dagiti daniw a mapadayawan iti RFAAFIL 2004-2005.

Kas gagangay a mapaspasamak kadagiti pasalip, agsasarak dagiti hurado iti personal. Ti RFAAFIL kas umuna a pasalip nga agaramat babaen ti Internet, saanna ngarud nga aramaten dayta a wagas. Iti napalabas a pasalip ti RFAAFIL iti sarita, nagsasarak laeng dagiti hurado ditoy website ti RFAAFIL. Kastoy met laeng ti kayatmi a maaramid ita a tawen iti umuna a pasalip iti daniw.

Kayatmi nga ipakaammo a daytoy a lugar a simrekanyo ket naaladan a para laeng kadakayo a hurado tapno maaywanan ti kinatakneng ken kinadalus ti pasalip kangrunaanna ti kredibilidad ti RFAAFIL. Dawatenmi ngarud a basaenyo ti pagannurotan ken dagiti kalikagum nga ipakpakaasimi a masurot para iti pannakatungpal dagiti intuyangmi nga addang ken panagballigi ti pasalip.

No adda dagiti saludsod wenno bambanag a kayatyo a malawlawagan,  nawayakayo  a  mangipatulod.  Usaren laeng ti E-lokano Mail wenno iturong iti rfaafil@hotmail.com tapno naparpartak a dumanon ti mensaheyo kadakami.

Agyamankami unay iti naimpapusuan a panangawatyo iti pagrebbengan nga agtakem a hurado iti pasalip ti RFAAFIL.

Toy Sidadayaw,

RFAAFIL