1. Agsasarak laeng dagiti hurado ditoy website ti RFAAFIL ket awanen sabali a lugar.

2. Agbalin a palimed ti kinasiasino dagiti hurado iti panawen ti panagpipili. Adda parbo a nagan a mausar aglalo iti forum. Mabalin a mairakurakto dagiti pasamak ngem saanto nga i-identify ti RFAAFIL no asino ti hurado iti likudan dagita a parbo a nagan. Maiwaragawagto ti madaydayaw a nagan dagiti hurado iti GF Convention a pakapadayawan dagiti mangabak.

3. Saan a maiwaragawag dagiti rangko dagiti mapili a daniw sakbay ti GF Convention 2004. Mabalin ketdi a mairakurak a dagus dagiti 5 a mapili a daniw kasta metten ti pudno a nagan dagiti autor apaman nga addan resulta ti pasalip.

4. No adda pannakabalinna, mangilanad iti forum ti kada hurado iti paniriganna, ababa man wenno atiddog, iti tunggal daniw a nakastrek iti TOP 5. No addanto man mapili ti RFAAFIL nga irakurak a komento wenno panirigan, irepresentarnanto dagita a kritika wenno panirigan a naggapu iti sibubukel a kapanunotan dagiti tallo a hurado a saan ket nga iti maymaysa laeng a hurado.

5. Awan tema ti daniw a putaren ngem nadakamat iti pagannurotan ti pasalip daytoy a paglintegan: Nawaya ni mannaniw a mangpili iti temana ngem nasaysayaat no ti daniw ket mairuknoy iti www.rfaafil.com, ti pagtaengan ti RFAAFIL iti internet. Ikalikagummi ngarud, Apo Hurado, a manayonan iti puntos (manipud iti 5% agingga iti 10% a grado) ti daniw a mairuknoy iti website ti RFAAFIL.

6. Nupay adda deadline a panagisubmitir kadagiti grado, pagyamananmi unay no nasapsapa nga ipatulod dagitoy ngem iti nasao a deadline. Dakkel a tulong daytoy tapno maplantsa a naimbag dagiti sumaruno nga aktibidad iti pasalip. Kangrunaanna metten ti interes dagiti nakisalip ken dagiti sumubsubaybay nga agbasbasa.

7. Ipatulod ni Apo Hurado ti e-mail addressna a pakakontakan ti RFAAFIL kenkuana.