KALPASAN ti lima a bulan a panagbutos dagiti agbasbasa no ania a sarita ken daniw ti magustuanda tapno mapadayawan iti maika-3 a Reader's Choice Award, adtoyen ti napilida a gapuanan ni mannurat.

Panggep ti Reader's Choice Award

Panagtultuloy a pannakaputar dagiti dekalidad a sarita ken daniw, panagrang-ay ni mannurat, ti GUMIL ken ti Literatura Ilokana ti panggep a ragpaten ti RFAAFIL Reader's Choice Award.

RFAAFIL 2005 Reader's Choice

Daytoy ti lugar, website wenno link a naaramat iti panagbutos iti RFAAFIL 2005 Reader's Choice Award. Nailawlawag ditoy ti panggep, pagannurotan, saludsod ken sungbat kadagiti opinion ken paliiw iti daytoy a proyekto. Nairakurak dagiti sarita a mabutosan a saanen a naaladan a kas iti napalabas ngem naiget ketdi a nasurot ti pagannurotan iti pannakadagup dagiti butos. Iti kasta, naaywanan ti kredibilidad ti pammadayaw nga iruknoy dagiti agbasbasa ken ni mannurat a magustuanda ti gapuananna.

Dagiti Sarita ken Daniw a Nabutosan 

Nangrugi ti panagbutos idi Hunio 1, 2005 ket nagpatingga iti Oktubre 31, 2005. Dagiti lima a napili a kapintasan a sarita ken daniw iti maikatlo a tawen a panagpasalip ti RFAAFIL ti binutosan dagiti agbasbasa.

SARITA:
 - Dagiti Proverbio iti Biag ni Maestro Modesto
 - Gagan-ayan
 - Ma'am
 - Panagtimbog
 - Adtoyak, ni Tranquilino Tacneng: Iti 28 Kadsaaran a Lubong

DANIW:
 - Agmanoka iti Patneng nga iti Niebe Nagramuten
 - Haiku: www.rfaafil.com
 - Rebolusion
 - Sagidek Latta ti Kiday, www.rfaafil.com
 - Sarabuenka a Kayaw ti Mariing a Parparmatak

Kinatan-ok ti maysa a pagsapulan ti nagsasalipan dagiti mannurat.

Ti Resulta

Saan a gagangay a free online voting ti napasamak. Adu dagiti agbasbasa a nakipartisipar laeng babaen ti rfaafil.com POLL a saanda a sinurot ti pagannurotan. Saan ngarud a naibilang dagitoy a butosda.

Ti Secretariat mismo ti nagipaskil kadagiti opisial a butos a naisubmitir. Kitaen ti resulta para iti sarita ken daniw nga irepresentar dagiti dua nga agsaruno a graph iti baba:

Dagiti Nangabak

Mayawatto dagiti pammadayaw kadagiti nangabak a mannurat iti kombension nasional ti GUMIL Filipinas a nalabit a maangay idiay Gonzaga, Cagayan inton kalgaw ti 2006.

  SARITA: Dagiti Proverbio iti Biag ni Maestro Modesto
  Mannurat: Joel B. Manuel
  Gunggona: P3,000.00 ken sertipiko

  DANIW: Sagidek Latta ti Kiday, www.rfaafil.com 
  Mannurat: Dexter M. Fabito 
  Gunggona: P1,000.00 ken sertipiko

Makuna Dagiti Nangabak a Mannurat

"Yamanenmi kadi unay, apo, kadakayo nga esponsor ken kadagiti tagipatgen a readers no napagasatan ti saritami. Matdakami la ngarud a mangitalimeng iti rag-o iti pusomi iti daytoy a mainayon a pammadayaw ti sarita a pinutarmi," kuna ni JBM. "No amadenyo ti masaritami maipapan iti no ania ngata ti nagustuan dagiti readers iti saritami, maysa laeng a pugpugto ti maibagami, ta tunggal managbasa, addaan iti bukodna a pangtukodan ken pagrukodan no ania ti napintas wenno magustuan a sinurat para kenkuana."

"Napalalo unay ti yaman ken ragsakko ta napili dagiti hurado ti daniwko ngem ad-adda manen ta magustuan pay gayam dagiti agbasbasa ti gapuanak.  Addayta pay nga ur-urayek a mairaman daytoy a gapuanak iti Sagut 2," kinuna met ni DMF. "Diakto pulos malipatan daytoy a banag. Saan a gapu ta inar-arapaapko ti makailibro, no di ket adda ti RFAAFIL ken dagiti readers a nangrubrob iti essemko nga agsurat ken patiek a dakkel unay ti naitulongyo kaniak."

Dagiti Napagasatan nga Agbasbasa

Kas panagyaman ti RFAAFIL kadagiti agbasbasa a nakipartisipar iti 2005 Reader's Choice, adda gunggona nga agpaay kadagiti uppat a nagasat a readers. Isuda da: Joemar Acosta (rfaafil.com T-shirt), Jennielyn Lagman (rfaafil.com T-shirt), Maricar Esguilar (rfaafil.com T-shirt) ken Rouy Agresor (libro a SAGUT). Agyamankami unay, patgenmi a readers!

Gapuanan ti Reader's Choice

Iti pannakaisayangkat ti RFAAFIL Reader's Choice iti maikatlo a daras babaen iti awan patinggana a tulong dagiti naayat nga agbasbasa, maaramat ti pundo para iti pannakaipablaak ti sumaruno a libro ti RFAAFIL, ti SAGUT 2. Ken mausar iti pannakataginayon ti proyekto ti RFAAFIL nga A.N.A.K. (Addang Nga Agayab Kamannurat: Awis Nga Agpaay Kailokuan).

Iti daytoy a gundaway, ipeksa ti RFAAFIL ti naimpapusuan a panagyamanna kadagiti amin a mannurat a nakisalip, kadagiti hurado, iti Bannawag, iti Tawid News Magasin, kangrunaanna kadagiti rinibribu nga agbasbasa, ken kadagiti amin a naayat a tumultulong iti panagrang-ay ti Literatura Ilokana.®