KALPASAN ti panagbutos dagiti agbasbasa no ania a sarita ken daniw ti magustuanda tapno mapadayawan iti maika-4 a tawen ti Reader's Choice Award, adtoyen ti napilida a gapuanan ni mannurat.

Panggep ti Reader's Choice Award

Panagtultuloy a pannakaputar dagiti dekalidad a sarita ken daniw, panagrang-ay ni mannurat, ti GUMIL ken ti Literatura Ilokana ti panggep a ragpaten ti RFAAFIL Reader's Choice Award.

RFAAFIL 2006 Reader's Choice

Daytoy ti lugar, website wenno link a naaramat iti panagbutos iti RFAAFIL 2006 Reader's Choice Award. Nailawlawag ditoy ti panggep, pagannurotan, saludsod ken sungbat kadagiti opinion ken paliiw iti daytoy a proyekto. Nairakurak dagiti sarita a mabutosan a saanen a naaladan a kas iti napalabas ngem naiget ketdi a nasurot ti pagannurotan iti pannakadagup dagiti butos. Iti kasta, naaywanan ti kredibilidad ti pammadayaw nga iruknoy dagiti agbasbasa ken ni mannurat a magustuanda ti gapuananna.

Dagiti Sarita ken Daniw a Nabutosan 

Nangrugi ti panagbutos idi Abril 1, 2006 ket nagpatingga iti Oktubre 31, 2006. Dagiti lima a napili a kapintasan a sarita ken daniw iti maikapat a tawen a panagpasalip ti RFAAFIL ti binutosan dagiti agbasbasa.

SARITA:
 - Maysa a Rabii iti Sirok ti Daldaligan 
 - Ritual 
 - Sibibiag a Kankanayon Dagiti Kanito 
 - Ti Makina ken Ti Pamilia ni Nana Nora 
 - Ti Surat ni Father John Feeley

DANIW:
 - Diken
 - Istrapo ken Kattukong 
 - Naukrad a Dakulap 
 - Panagballasiw
 - Ti Gayyemko a Mannaniw

Panaggayyem (friendship) ti tema a nagsasalipan dagiti mannurat.

Ti Resulta

Saan a gagangay a free online voting ti napasamak. Adu dagiti agbasbasa a nakipartisipar laeng babaen ti rfaafil.com POLL a saanda a sinurot ti pagannurotan. Saan ngarud a naibilang dagitoy a butosda.

Ti Secretariat mismo ti nagipaskil kadagiti opisial a butos a naisubmitir. Kitaen ti resulta para iti sarita ken daniw nga irepresentar dagiti dua nga agsaruno a graph iti baba:

Dagiti Nangabak

Mayawatto dagiti pammadayaw kadagiti nangabak a mannurat iti sumaruno a kombension nasional ti GUMIL Filipinas inton kalgaw ti 2007.

  SARITA: Maysa a Rabii iti Sirok ti Daldaligan
  Mannurat: Joel B. Manuel
  Gunggona: P3,000.00 ken sertipiko

  DANIW: Naukrad a Dakulap 
  Mannurat: Agustin DC. Rubin 
  Gunggona: P1,000.00 ken sertipiko

Makuna Dagiti Nangabak a Mannurat

"Nabukel dayta a sarita a kas mairuknoy ken ni tatangko a nangted kaniak iti 'mata' ken 'lagip' maipapan iti gubat. Dagiti padasna ti gapuna a naisuratko daytoy. Patiek nga amin a mannurat, saanda a kukua dagiti sinuratda, kukua daytoy ti ili, dagiti padas ti puli. Akem laeng ni mannurat ti mangurnos, ti mangilawag no ania dayta. Daytoy a sarita ti nanumo a kontribusionko iti lagip ti Kailokuan maipapan iti panaggayyem ti dua a tao iti sango ti gubat." kuna ni JBM. "Di mabubos a panagyaman kadakayo ken kadagiti managbasa iti daytoy manen a balangat a naipatapat iti dayta a saritak."

"Kalpasan ti saritak a "Kanta iti Sab-ok...", adtoy a napili manen dagiti agbasbasa ti sabali manen a gapuanak- ti 'Naukrad a Dakulap' a daniwko," kinuna met ni ADCR. "Pakaidayawak unay no nagustuan manen dagiti agbasbasa ti sinuratko."

Dagiti Napagasatan nga Agbasbasa

Kas panagyaman ti RFAAFIL kadagiti agbasbasa a nakipartisipar iti 2006 Reader's Choice, adda gunggona nga naited kadagiti nagasat a readers. Dagitoy dagiti nangabak iti paripa: Lety Aquino, Joebert Pacnis, Estela Ponce, Pablito Alcantara, Dr. Clarito de Francia, Avelina Castro-Visaya ken uppat nga estudiante a delegado iti kombenion ti GF a saanen a mainaganan. Agyamankami unay, patgenmi a readers!

Gapuanan ti Reader's Choice

Iti pannakaisayangkat ti RFAAFIL Reader's Choice iti maikapat a daras babaen iti awan patinggana a tulong dagiti naayat nga agbasbasa, maaramat ti pundo para iti pannakataginayon kadagiti proyekto ti RFAAFIL a pakairamananen ti A.N.A.K. (Addang Nga Agayab Kamannurat: Awis Nga Agpaay Kailokuan).

Iti daytoy a gundaway, ipeksa ti RFAAFIL ti naimpapusuan a panagyamanna kadagiti amin a mannurat a nakisalip, kadagiti hurado, iti Bannawag, kangrunaanna kadagiti rinibribu nga agbasbasa, ken kadagiti amin a naayat a tumultulong iti panagrang-ay ti Literatura Ilokana.®