KALPASAN ti panagbutos dagiti agbasbasa no ania a sarita ken daniw ti magustuanda tapno mapadayawan iti maika-5 a tawen ti Reader's Choice Award, adtoyen ti napilida a gapuanan ni mannurat.

Panggep ti Reader's Choice Award

Panagtultuloy a pannakaputar dagiti dekalidad a sarita ken daniw, panagrang-ay ni mannurat, ti GUMIL ken ti Literatura Ilokana ti panggep a ragpaten ti RFAAFIL Reader's Choice Award.

RFAAFIL 2007 Reader's Choice

Daytoy ti lugar, website wenno link a naaramat iti panagbutos iti RFAAFIL 2007 Reader's Choice Award. Nailawlawag ditoy ti panggep, pagannurotan, saludsod ken sungbat kadagiti opinion ken paliiw iti daytoy a proyekto. Nairakurak dagiti sarita a mabutosan a saanen a naaladan a kas iti napalabas ngem naiget ketdi a nasurot ti pagannurotan iti pannakadagup dagiti butos. Iti kasta, naaywanan ti kredibilidad ti pammadayaw nga iruknoy dagiti agbasbasa ken ni mannurat a magustuanda ti gapuananna.

Dagiti Sarita ken Daniw a Nabutosan 

Nangrugi ti panagbutos idi Abril 1, 2007 ket nagpatingga iti Disiembre 31, 2007. Dagiti lima a napili a kapintasan a sarita ken daniw iti maikalima a tawen a panagpasalip ti RFAAFIL ti binutosan dagiti agbasbasa.

RFAAFIL 2007 READER'S CHOICE AWARD

DAGITI NAGPILIAN A SARITA Basikaw, Pagutpot, Sukdip JAIME G. RARAS Imeng ken Anglem iti Sakbibi ti Niebe PRODIE GAR. PADIOS Ayat iti Panawen ti Ariangga AURELIO S. AGCAOILI Yna AIDA C. TIAMA Panagbukar REYNALDO A. DUQUE DAGITI NAGPILIAN A DANIW Sapulem ti Kulluong JOBERT M. PACNIS Barangabang AURELIO S. AGCAOILI Essem ROY V. ARAGON Independencia Y Revolucion BENJAMIN P. PACRIS Kudos iti Ayatmo iti Bukodtayo a Dila PRODIE GAR. PADIOS

Ayat ti tema a nagsasalipan dagiti mannurat.

Ti Resulta

Saan a gagangay a free online voting ti napasamak. Adu dagiti agbasbasa a nakipartisipar laeng babaen ti rfaafil.com POLL a saanda a sinurot ti pagannurotan. Saan ngarud a naibilang dagitoy a butosda.

Ti Secretariat mismo ti nagipaskil kadagiti opisial a butos a naisubmitir. Kitaen ti resulta para iti sarita ken daniw nga irepresentar dagiti dua nga agsaruno a graph iti baba:

Dagiti Nangabak

Mayawatto dagiti pammadayaw kadagiti nangabak a mannurat iti sumaruno a kombension nasional ti GUMIL Filipinas inton kalgaw ti 2008.

  SARITA: Basikaw, Pagutpot, Sukdip
  Mannurat: Jaime G. Raras 
  Gunggona: P3,000.00 ken sertipiko

  DANIW: Sapulem ti Kulluong
  Mannurat: Jobert M. Pacnis 
  Gunggona: P1,000.00 ken sertipiko

Makuna Dagiti Nangabak a Mannurat

"Panamatik nga adda talibagok ti tunggal mannurat, adda bukel ti kinapudno a kayatna nga iburay isu a nangbukel iti maysa a sarita." inlanad ni J. G. Raras, ti Candon City, Ilocos Sur. "Dakkel a pakaidayawan 'toy numo ta napili dagiti agbasbasa ti saritak ket isu't napusgan a mangabak iti Reader's Choice Award itoy a tawen - 2007."

"Umuna unay, pagyamanak dagiti agbasbasa no nagustuanda ti daniwko," kinuna met ni J. M. Pacnis, ti Ammubuan, Ballesteros, Cagayan. "Lugayankayo iti RFAAFIL iti naanep a panangpabpabaknangyo iti literaturatayo a Saluyot. Agbiagkayo!."

Dagiti Napagasatan nga Agbasbasa

Kas panagyaman ti RFAAFIL kadagiti agbasbasa a nakipartisipar iti 2007 Reader's Choice, adda gunggona a naited kadagiti nagasat a readers. Dagitoy dagiti nangabak iti paripa: Myrla Ulep, Jolea Almadin, Christopher Barsen. Agyamankami unay, patgenmi a readers!

Gapuanan ti Reader's Choice

Iti pannakaisayangkat ti RFAAFIL Reader's Choice iti maikalima a daras babaen iti awan patinggana a tulong dagiti naayat nga agbasbasa, maaramat ti pundo para iti pannakataginayon kadagiti proyekto ti RFAAFIL a pakairamananen ti A.N.A.K. (Addang Nga Agayab Kamannurat: Awis Nga Agpaay Kailokuan) ken ti Benneg ti Agdadamo a pasalip kadagiti agngayngayangay a mannurat.

Iti daytoy a gundaway, ipeksa ti RFAAFIL ti naimpapusuan a panagyamanna kadagiti amin a mannurat a nakisalip, kadagiti hurado, iti Bannawag, kangrunaanna kadagiti rinibribu nga agbasbasa, ken kadagiti amin a naayat a tumultulong iti panagrang-ay ti Literatura Ilokana.®