1.

Agsapa nga agdardaras dagiti mukod iti nabisil

a dalan. Maliklikba ti panulpeten a daster. Malaplapgis

ti bulong ti pangis nga ismagel a nagaw-is

itay ti maar-arakattot a dapan. Ipimpinas

ti baningrot iti nalayus a pingping

ti sumagmamano a nginabras ti buok

a simmiasi iti naisamsambot a pinggol. Idinto

nga aw-awiren ti saning-i ti bakruy nga apagpakayang

a buridek, sumalsalipengpeng iti naparkaganen a barukong

a maipariten a makunnot: pinusot ti nagmaga a pamguongan

ken ti narutrotanen a tungil a marunggi

iti inaladan. Kumamkamakam pay laeng ti naerreng

a laaw ken ngadal a tabbaaw ti kaingungot a "tunay

na lalaki." Ipalpalapalna ti tartaraudi a taso

ken sippapo, ballaag ti dugol ken kabbibaw. Iti malabsan

a desdes, natanang ti panagsarimutmot ti getteb

ti an-anakan a kalding, iti baet dagiti siit, kadagiti nagkeppet

a bulong ti bainbain. Tedda ti angrag ken arab.

Ibulbulonna iti ngatingat ti pugsopugsot, nalalanay

nga immik. Kabayatan nga idugsodugsol ti dua nga inauna

ti kunnotda iti nagsinsinanda a kulay-ong a pukal. Di malamut

ti aso, wenno uray kalding, dagiti masallasallapid a katay

ken unget, sumursurot, ngem din makagam-ud. Idi kuan naiburais,

naiburandis dagiti pimmasas a tinukel: ganagan met

daytoy tapno agukap dagiti keppet, agbukar

dagiti sabong, tumangken dagiti siit, kumutukot

dagiti ramut. Pagdigdigosanen ti esposo ti bukodna

a sarua ken ternek, ngilngilawen ti ngangana a narnek.

2.

Sab-ok ti butaka ti main-iniin a bussog: panangtaraken

iti boksit, panangipariir iti maipalpa a pangngaldaw,

iti sirok ti nagruyag a mangga. Masikoran pay

laeng ti pagingat nga amil-amilen ti bibig, agtatapaw

iti dila kalpasan a nasukilna dagiti murkat

a nagapon iti gugot. Makumikom

ti pul-oy a mangawis iti tuglep. Iti arubayan,

kakak a kakak ti upa a kalkalpasna la a nagitlog,

kataptapuak manipud iti baki. Agal-al-al, nadagaang

ti panageddek. Idinto a maseknan met latta a makirkiran

ti nakamurareg a puseg. Maikulukol ti tammudo wenno kikit.

Makaut ti nagbalay a tekkab. Ket iti pakatungpalan

ti sabor ti ritual ti siesta, angoten ti kimriit a mureng: maimusiig

ti panangnanam iti naimas a bangsit. Pagammuan

la ta kimmamat ti kawitan, manador a nakasiput. Kutak

ti kinnutak, kinnamat agingga a naipuged

ti naipuged, inggawid ti sippit ken kawwet. Apagbiit

la a pulagid, ar-arak iti panangtangad manen

iti baki inton bigat. Agingga't panaguukop.

Buntok ti sarigsig ken taraok. Iti butaka, sumarsarut

itan ti ligsay iti ruyag, daydayasenna ti nargaanen nga urok.

3.

Kutkutiman ti sardam dagiti umar-aripapa nga apros.

Dakulap iti dakulap, kudil iti kudil, dam-eg iti dam-eg. Dinigos

ti nakusnaw a sipnget ti agin-innapungol nga anges.

Agin-indayon ti kortina a palpal-idan ti salemsem, rummuar-

umuneg iti ruangan ti dua a kuting nga agganggantil, agkinkinnamat,

agtintinniliw iti karamut. Ngem awan bibiang dagiti aglulualo

iti nauuneg nga arasaas. Iti atep, nagdalagudog dagiti nataengan

a paddak. Naiwayat ti nabulosan nga asug wenno riaw iti panaglinnagid

dagiti nakalamlammiis nga agong. Dagiti naginnaplit sa nagkinnawikaw

a nalamuyot nga ipus. Kasla ngipen ti ikkis a maipakdem

iti masorpresa a bao a rummuar iti abut. Gumammat ti natarumamis

a kuko, maiyilut ti nakersang ken kiote a dilpat. Sumpok

iti kasipngetan ti mapabutngan a marabutit. Maibus

met la dagiti di maibus nga anangsab ket agkirpa ti rabii. Agammusay

ti bigat a mangpadaan iti maipaburek a kape ken maiprito

a karing. Agandar manen ti siririing nga urok, mailagud-

lagud manen ti natibker, natangken latta nga ipus.