KALPASAN ti panagbutos dagiti agbasbasa no ania a sarita ken daniw ti magustuanda tapno mapadayawan iti maika-6 a tawen ti Reader's Choice Award, adtoyen ti napilida a gapuanan ni mannurat.

Panggep ti Reader's Choice Award

Panagtultuloy a pannakaputar dagiti dekalidad a sarita ken daniw, panagrang-ay ni mannurat, ti GUMIL ken ti Literatura Ilokana ti panggep a ragpaten ti RFAAFIL Reader's Choice Award.

RFAAFIL 2008 Reader's Choice

Daytoy ti lugar, website wenno link a naaramat iti panagbutos iti RFAAFIL 2008 Reader's Choice Award. Nailawlawag ditoy ti panggep, pagannurotan, saludsod ken sungbat kadagiti opinion ken paliiw iti daytoy a proyekto. Nairakurak dagiti sarita ken a mabutosan a saanen a naaladan a kas iti napalabas ngem naiget ketdi a nasurot ti pagannurotan iti pannakadagup dagiti butos. Iti kasta, naaywanan ti kredibilidad ti pammadayaw nga iruknoy dagiti agbasbasa ken ni mannurat a magustuanda ti gapuananna.

Dagiti Sarita ken Daniw a Nabutosan 

Naidasar kadagiti agpasbasa dagiti napili a lima a kapintasan a sarita ken daniw iti panagpasalip ti RFAAFIL tapno pilienda ti magustuananda.  Nagpatingga ti panagbutos dagiti agbasbasa iti panagtapos ti tawen.

RFAAFIL 2008 READER'S CHOICE AWARD

DAGITI NAGPILIAN A SARITA Ken ni Pidut: Dagiti Daton iti Angep JOEL B. MANUEL Manipud ken ni Proailurus Agingga ken ni Dante ERROL L. ABREW Ni Apo Tacio, Ni Lampangog, ken ni Manoling ARNOLD P. JOSE Taokayo la nga Agpayso EFREN A. INOCENCIO Resibo CLARITA A. SUMAHIT DAGITI NAGPILIAN A DANIW Iti Kari ti Lunod: Sika ken Siak JOHMAR R. ALVAREZ Taguob GIOVANNI L. PALOMARES Tattao, Ay-ayup, Kinatao, Kinaayup: 3 nga Imahen ROY V. ARAGON

Maipanggep iti tao ken ayup ti tema a nagsasalipan dagiti mannurat.

Ti Resulta

Saan a gagangay a free online voting ti napasamak. Adu dagiti agbasbasa a nakipartisipar laeng babaen ti rfaafil.com POLL a saanda a sinurot ti pagannurotan. Saan ngarud a naibilang dagitoy a butosda.

Ti Secretariat mismo ti nagipaskil kadagiti opisial a butos a naisubmitir. Kitaen ti resulta para iti sarita ken daniw nga irepresentar dagiti dua nga agsaruno a graph iti baba:

Dagiti Nangabak

Mayawatto dagiti pammadayaw kadagiti nangabak a mannurat iti sumaruno a kombension nasional ti GUMIL Filipinas inton kalgaw ti 2009.

  SARITA: Ken ni Pidut: Dagiti Daton iti Angep
  Mannurat: Joel B. Manuel 
  Gunggona: P3,000.00 ken sertipiko

  DANIW: Taguob
  Mannurat: Giovanni L. Palomares 
  Gunggona: P1,000.00 ken sertipiko

Makuna Dagiti Nangabak a Mannurat

"Ti kinasinged ti pannakilangen ti tao iti ayup, ken ti ayup iti tao, ti kayatko a palbogen iti daytoy a sinuratko. Manipud iti tukot ti pusok, agyamanak," kinuna ni Joel. B. Manuel, ti Banna, Ilocos Norte. "Kunaek a dakkel manen a balligi para kaniak ti pannakapili ti saritak iti maikatlo a gundaway a maikari iti Readers' Choice Award."

"Agyamanak iti RFAAFIL iti daytoy pasalipna ket bigbigek a maysa a dakkel a pammadayaw ti panangpili dagiti naayat nga agbasbasa ken mangipatpateg iti Literatura Ilokana ti daniwko a TAGUOB." kinuna met ni Giovanni. L. Palomares, ti Quezon City. "Ti aso ti kasingedan a gayyem ti tao. Gapu itoy, isuda koma ket maayat met a kas iti panagayatda kadatayo. Daytoy ti kayatko a maimutektekan dagiti agbasbasa iti sinuratko a daniw."

Dagiti Napagasatan nga Agbasbasa

Kas panagyaman ti RFAAFIL kadagiti agbasbasa a nakipartisipar iti 2008 Reader's Choice, adda gunggona a naited kadagiti nagasat a readers. Dagitoy dagiti nangabak iti paripa: Gabriel San Mateo, Jennifer Balisi, Joemar Tagadin. Agyamankami unay, Patgenmi a readers!

Gapuanan ti Reader's Choice

Iti pannakaisayangkat ti RFAAFIL Reader's Choice iti maikanem a daras babaen iti awan patinggana a tulong dagiti naayat nga agbasbasa, maaramat ti pundo para iti pannakataginayon kadagiti proyekto ti RFAAFIL a pakairamananen ti A.N.A.K. (Addang Nga Agayab Kamannurat: Awis Nga Agpaay Kailokuan) ken ti Benneg ti Agdadamo a pasalip kadagiti agngayngayangay a mannurat. Agpada a proyekto para kadagiti agdadamo iti tay-ak ti panagsuratan.

Iti daytoy a gundaway, ipeksa ti RFAAFIL ti naimpapusuan a panagyamanna kadagiti amin a mannurat a nakisalip, kadagiti hurado, iti Bannawag, kangrunaanna kadagiti rinibribu nga agbasbasa, ken kadagiti amin a naayat a tumultulong iti panagrang-ay ti Literatura Ilokana.®