Lapat Sarita ni VIRGILIO S. NAUNGAYAN
	UMUNA A GUNGGONA RFAAFIL 2008-2009

NALAWAG a mangngeg ditoy balay ti ungor ti buldoser manipud iti daya. Kasla adda iti asideg ti karayan. Agaramidda ngata iti dike? Ngem awan met ti ammok a kasta a proyekto nga inlatang ti gobierno lokal nga agpaay iti barangaymi a Baang. Kas kapitan ti barangay, ammok latta koma no adda. Inkeddengko nga innak kitaen.

          Dinagasko ni Barangay Tanod Isko a kaarrubak. Nagnagnakami; pangwatwatan.

          Ti karayan iti nagbaetan ti Barangay Bagbagutot iti daya ken ti barangaymi a Baang iti laud. Kimmalawikiw daytoy nga agtunged iti Baybay Tsina. Mais ti ad-adda a maimulmula kadagiti daga iti asideg ti Teppang.

          Adu ti fish cage a naipattopattok iti karayan. Bangus, tilapia, malaga ken kapiged ti nakapupok. Nalabon pay ti tirem a maap-apit. Nasayaat a panggedan ti agtaraken iti lames kasta met ti panagtirem. Anus ken bassit a puonan, mabalinen ti mangtikub iti pagpupokan. Isuna laeng ta no agpadlawen ti dakes a tiempo iti bulan ti Mayo wenno Hunio, maakasen dagiti fish cage ta dinto ket mayanud iti panagdinnakkel ti karayan santo man met laengen maisubli kalpasan ti tudtudo.

Malaksid kadagiti pupok nga ikan, nabaknang pay ti karayan kadagiti nagduduma a lames, pasayan, kappo ken arimbukeng. Nalatak ti lugarmi gapu kadagitoy a produkto. Saan a maab-abbatan ti karayan uray pay katikagna. Ngem no tiempo ti tudtudo ken bagyo, agdinnakkel ken pasaray tebbagenna ti daga. Nalawan a talon ti kinurkurabanna iti naunday a panawen. Idi, pangadaywen ti karayan iti kabalbalayan iti amianan a paset ti barangay. Ngem ita, immasidegen.

          “Ti met daga ni Dr. Soliven ti mabulbuldoser, Kap,” kinuna ni Isko uray idi masarsaripatpatanmi pay laeng ti umas-asimbuyok a buldoser.

          “’Nia ngata ti aramidenda?” sinaludsodko nupay ammok nga uray ni Isko, dina met ammo ti sungbatna. Nabiit pay a simmangpet ni Dr. Deodato Soliven manipud idiay London a pagtartrabahuanna ken pagindegandan a sangapamilia. Adda balayda a pinatakderna idiay ili a pagtartarusanda no agbakasionda ditoy La Union.

          Nabayag a saan a namulmulaan ti daga ni Dr. Soliven a nagatangna idi agpapaay pay a doktor iti ospital probinsial. Nasurok a maysa nga ektaria ti kalawana. Sumagmamanon a kayo ti nagtubo dita a kas kadagiti mansanita ngem ad-adda a dagiti ledda ti nangpasamek.

          Adda tallo a lallaki nga agpatpatpat kadagiti ledda a nadanonmi. Maysa kadakuada ni Ramon a kabsat ni Dr. Soliven.

          Immasideg ni Ramon iti ‘yanmi idi makitanakami.

          “Naimbag a bigatyo, Kap,” inkablaawna. Agar-arimasa ti ling-et kadagiti takiagna. “Padalusan ken palimpia ni manong daytoy ta paaramidna kano a lapat.” Nakali a pagpupokan iti lames ti kayatna a sawen.

          “Kasta? Kasanot’ kalawana?” naipigsak ta naung-ungor manen ti buldoser iti ‘yanmi.

          “Saan nga isu amin, Kap. Adda mabati a pagbangonan iti kubo-kubo para kadagiti agbantay ken tinto payen mangkongkreto nga aladna.”

          “Kasano met ti kaadayo ti malapat manipud iti teppang.”

          “Agkinse a metro ngata, Kap.”

          “Masapul ngarud, a, ti pammalubos ti DENR. Ngamin, masaknaran to karayan ken ti posible a pannakainaigna iti didigra.”

          “Madama nga as-asikasuen ni manong, Kap.”

          “Pakibagamto man ngarud ken ni Doktor ta pagsasaritaanmi idiay Barangay Hall inton bigat, iti alas tres ti malem. Uray ta Domingo no bigat, awanto met ngata ti papanan a sabali ni Doktor. Paayabakto met dagiti akinkukua kadagiti daga a maapektaran iti panaglapatyo.”

          “Wen, Kap.”

          Iti dalanmi nga agawid, sangkakudkod ni Barangay Tanod Isko ti teltelna. “Nalawa gayam ti malapat, Kap. Saan ngata a delikado no agdinakkel ti karayan?”

          “Dayta ngarud ti nakaam-amak. Amanganto ketdi no tebbagen ti agus ket dumupar iti kabalbalayan.”

 

          ITI Barangay Hall, iti kabigatanna, nabang-aranak ta awan pay alas tres iti malem, addan ni Dr. Soliven, nagtraysikel pay ketdi a naggapu idiay ili idinto nga adda met us-usarenna a kotse, banag a rinaemko ti kinapakumbabana. Adda met dagiti tallo nga akinkukua kadagiti daga a kadappat ti daga a malapat, ken adda amin dagiti pito a Barangay Kagawadko, ken ti sekretaria ti barangaymi nga agirekord kadagiti mapagsasaritaan. Nakasangokami iti atiddog a lamisaan.

          Immuna ti panagkararagmi babaen ti panangidaulo ni Kagawad Loding a napeklan a Metodista. Nakatakderkami bayat ti panagkararag.

          “Naimbag a malemyo amin,” panangirugik apaman a nakatugawkamin amin ia nanglawlaw iti lamisaan. “Kas immunan a nayabiso kadatayo amin, pagsasaritaantayo ti maipanggep iti plano ni Dr. Soliven a manglapat iti dagana iti asideg ti karayan…”

          Awan arimekmek; napasnek ti panagdengngeg ti amin ket intuloyko, “Nupay pribado a pakaseknan daytoy a banag, adda met karbengan ti Konseho ti Barangay a makibiang agsipud ta malas-udan la ngarud ti barangay dayta a disso. Ken kangrunaanna, ti pannakasaluad ti karayan mainaig iti maaramid a lapat.”

          Nagtungtung-ed ti doktor a tanda ti yaanamongna ket naragsakanak. In-inauna nga adayo ti doktor ngem siak iti tawenko a limapulo ket lima. “Ti panaglapat iti asideg ti karayan, a kas iti panggep ni Dr. Soliven, masapul la unay ti pammalubos ti DENR no maikanatad met laeng ti proyekto nga awan ti pakadangranan ti karayan kasta metten dagiti sanikua iti aglawlawna ken ti awan ti didigra nga idatengna iti barangay. Kasapulan met a maipakaammo kadagiti maseknan nga akinkukua kadagiti daga a mabalin a maapektaran tapno adda panagkinnaawatan ti tunggal maysa. Dawatek ngarud ti biang ni Dr. Soliven nga agsarita maipanggep iti daytoy a banag.”

          “Thank you, Apo Kapitan. Naimbag a malemyo amin,” inkablaaw ti Doktor a nangisimpa iti degrado nga anteohosna. Naamo ti rupana, daytay saanka a maamak a mapan koma agpaagas kenkuana. “Dispensarem, Apo Kapitan, ti diak naipakaammo a dagus kadakayo daytoy a panggepko ta inun-unak ngamin ti napan iti DENR a nagdamdamag no kasano ti prosesona. Nasaoda a mangisubmitirak kano iti plano ti maaramid a lapat ken kasuratan a dimmalan ken natratar iti Konseho ti Barangay ti panggep a panaglapat. Kalpasanna, umayda kitaen isu a pinadalusak ken palimpiak bassit tapno agminar a mabasa ti planona.”

          “Kasano ngamin ti planona, Doktor?” inaamadko.

          “Maikkan iti tallo a pasngawna ken maaladan iti kongkreto. Magennegenned met iti tallo a paset ti pagpupokan.”

          “Kasapulan ngarud a natibker ti pannakaaramid dagiti aladna, Doktor.”

          “Wen, tapno di kas karina a matebbag ken maaluadan ti ania man a didigra a gubuayenna. Kinapudnona, paaramidkonto iti gayyemko nga inhiniero ti planona.”

          Napnekak iti kinuna ti Doktor. Isu a kinunak, “Sumaruno a talantanentayo ti biang dagiti akinkukua kadagiti daga a maapektaran. Appo a maseknan, gundawayyo daytoyen nga agsarita,” pinagsisinublatko a kinita ida; kabarangayanmi met la amin ida, malaksid iti maysa, amang a nalaklakayda ngem ni Doktor Soliven.

          “Ikalikagumko, Doktor, a nasayaat koma met laeng ti pannakaitambak dagiti makali a daga,” kinuna ni Tata Andoy.

          “Gapu ta maasak met ti dadduma a paset ti taltalonek, ipaspasigkon ken ni Doktor nga adda koma met bassit a gunggonami,” imbagi met ni Mang Ben.

          “Nasaon dagiti padak a maseknan ti kayatko nga ibaga,” insarurong ni Lakay Anastacio.

          “No anianto man ti perhuisio nga itdenna, mapatgan ti kiddawyo,” insungbat ni Dr. Soliven.

          “Ania met ti masaritayo, Kakadua?” dinamagko kadagiti padak nga opisial ti barangay.

          “Nasayaat a proyekto ta addanton manamnama a suplayer ti bangus ken tilapia ket dakkel ti maitulongna iti ekonomia ti ilitayo,” inrugi ni Kagawad Loding; nalaing a sumarita a kas iti kinalaingna a mangidaulo iti kararag. “Iti bangir a punto, saan a panangidawdawat, ngem nakadadanag. Amangan ta mateppang ti lapat iti panagdinakkel ti karayan ket agbanagto a pagdaliasatan ti agus a mangigubuay iti sabali a turong ti karayan ket di bumurong a tuparenna ti kabalbalayan.”

          “Kas pagarigan ta adunto ti tumulad nga aglapat, di pay ket magamgamsawton ti igid ti karayan kadagiti maaramid a pasngaw. Saanto ngata a pasimudaag dayta ti mainaw a kalamidad kontra iti nakaparsuaan?” inasaruno ni Kagawad Ruben, nangala iti kinamaestro ngem kaykayatna ti agtalon.

          “No malapat dagiti daga iti asideg ti agsumbangir a teppang, di mapengdan nga umababaw wenno maabbatan ti karayan ta iti kaadu dagiti lapat, awidenda ti danum ti karayan aglalo iti tiempo ti nakana nga igaaw, ket sumangbay ti nakas-ang a didigra ta nakisangton wenno awanto pay ketdin ti makalapan a lames ken dadduma pay a pagbiagan nga iparparabur ti karayan kadatayo,” kinuna met ni Kagawad Vicente a nangikakaubingan iti panagkalkalapna iti karayan.

          “Pagaammotayo a sumagmamanon a talon ti inteppang ti karayan sipud pay kinaubingtayo. ‘Nianto la ket ngatan no mataratar dagiti lapat iti asideg ti karayan? Panagkunak, maibilang met daytoy a panangabuso iti nakaparsuaan,” imbisik ni Kagawad Pitong, kataebko a managbasa iti Bannawag.

          Agtutugmok dagiti kapanunotan dagiti kagawad. Ti pagdaksan ti panaglapat ti bugas dagiti palawagda.

          “Kanunongak ti nasidap a panagpampanunotyo,” insungbat ni Dr. Soliven. “Wen, mabalin a mapasamak ti ania man kadagiti espekulasionyo ngem palugodandak man a mangaramid iti umisu ken kasayaatan a wagas ti panaglapat.”

          “Iti biangko, ti nasken ket ti pannakasaluad ti karayan a pagbibiagantayo. Ket ti DENR ti addaan iti naan-anay a pannakaammo ken addaan iti bileg a mangikeddeng no mapalubosan wenno saan ni Dr. Soliven a mangyusuat iti karbenganna nga aglapat,” kinunak a pinangigibus iti saritaan.

          Dandanin lumnek ti init idi agsisinakami.

          Iti dayta a rabii, nasaritak ken ni baket ti maipanggep iti nagpapatanganmi kada Dr. Soliven iti barangay hall. Duduakamin nga agbalbalay ken baket ta adda idiay Hong Kong dagiti dua nga annakmi a mabaketan metten a babbalasang. Agpadada a nagturpos iti kinamaestra ngem kaykayatda ti ag-domestic helper ta dakdakkel kano ti sueldoda. Addanto kano pay gundawayda a makapan idiay Canada.

“Milion la ketdi ngarud ti pateg dayta a proyekto. Ngem amangan ta dinto ket masurot ti planona ta mapanawanto metten ni Dr. Soliven,” kinuna ni baket, maysa a rehistrado a komadrona ken agpapaay iti health center idiay ili.

          “Adda met ni Ramon a mangkita,” kinunak.

          “Ay, diskumpiadoak iti daydiay. Ket no sugador.”

          “Addanto kenkuana no irubona ti kabsatna.”

 

          BABAEN ti naawatko a pakaammo manipud iti DENR, mapalubosan ni Dr. Soliven a manglapat iti dagana iti igid ti karayan. Karaman ti nasao a pakaammo ti furnished copy ti plano ti lapat nga indatag met laeng ni Dr. Soliven a namarkaan iti "Approved." Iti babana, naisurat ti rekomendasion ti ahensia: "Masapul a di nakurkurang ngem 40 a metro ti kaadayo ti lapat iti teppang. Mamulaan iti parakad ken ipil-ipil ti sango dagiti pasngaw nga agatiddog iti dua gasut a metro iti igid ti karayan.”

”Ti dakesna, nakalin. Kasapulan ngarud a makongkreton ti aladna uray ti pay laeng likud dagiti pasngaw sakbay ti mismo a pagpupokan,” insungbatko.

Idi maaramid ti pasngaw, saan met nga inraman ni Ramon a rinugian ti alad. Ti alad ti agserbi a trensera ti panagreggaay ti tambak nga agdusudos kadagiti kaarrubana a talon ken kangrunaanna, ti panagdakkel ti karayan. Mapengdan pay ti panagtakias dagiti pupok a lames no bilang ta sumalapasap ti danum ti tambak.

Kalpasan a naaramid ti pasngaw, pinupokan a dagus ni Ramon iti bangus ken tilapia ti lapat. Dadakkel ken nawadwad ti naapitna kalpasan laeng ti tallo a bulan. Impiduana ti nagipupok ken kaskasdi a nawadwad ti nakalapna.

Nagdinamag ti kaadu ti naapit ni Ramon. Naalimadamadko nga adda dagiti agpangep met nga aglapat. Pumayson sa ketdi ti ekspekulasion dagiti kagawad nga umadunto ti aglapat iti asideg ti karayan.

”Ramon, paaladamon ti lapat amangan ta salpaen ti danum iti panagdinakkel ti karayan,” impalagipko.

”Wen, Kap, iti mabiit,” insungbat ni Ramon.

”Saan a pannakibibiang kadagiti ar-aramidem no di ket patigmaan ken panangigigir iti mabalin a pannakasawang ti lapat. Paaramidmon no dimo kayat nga ipulongka ken ni manongmo,” imballaagko.

”Paaramidkonton iti mabiit, Kap,” insungbatna. Kasla madandanagan iti kinunak.

Rinugian ni Ramon nga aladan ti lapat. Ti adatna, saan met a diretso ti panagtrabahoda. Atiddog nga agpayso ti nakali ngem tallon sa laeng a deppa ti nalpas. Segun kadagiti trabahador, kurang ti badyet. Diak mamati. Naibaga idi kaniak ni Dr. Soliven a nakabanko ti kuarta nga aramaten ni Ramon. Adda agat-ginelgel a baraniw a masaysay-opko ngem namrayak laengen ti nagsennaay.

 

NALULEM ti tangatang. Segun iti PAGASA, magna ni Bagyo Korina iti Northern Luzon. Kas chairman ti Barangay Disaster Coordinating Council, minitingko dagiti kameng ti komite tapno isaganami ti adda a kabaelanmi. Nakadadanag ta super bagyo kano ti Korina segun met laeng iti PAGASA.

Ti Baang Elementary School nga adda iti nagpikoran ti kalsada nga agpaamianan ken agpaabagatan ti naituding nga evacuation center. Ditanto metten ti pannaka-headquartersmi nga agbantay.

Lima a kolman ti insaganami a pagsilaw ta sigurado la ketdi nga awanto ti koriente. Adda isaganami a sangkabassit nga agas ti gurigor ken panateng ken agas ti masugat. Adda met dua a lata a biskuit ken kape. Nakasagana metten ti dyip ti barangay a para iti emergency. Dua met a dadakkel a rakit ti sindadaan nga usaren no bilang nakaronto ti layus. Saggaysakami iti flashlight ken sumagmamano kadakami ti adda selponna.

”SAAN A MAATIPA TI DIDIGRA NGEM MASAPUL A NAKASAGANAKA, DIKA AGMALANGA, SAANKA MET A MATARANTA.” Dayta ti anag nga ibaybayog ti timpuyogmi iti panawen ti kalamidad.

Kabigatanna, napigsan ti bayakabak. Agpallayog dagiti bulong ti niog a basbasnotan ti angin. Pakpakauna daytan ti idadateng ti bagyo.

Kalpasan ti pangngaldaw, inabisuanmi dagiti agindeg iti ungto ti amianan nga asideg iti karayan ken ti lapat nga agpaingda pay laeng iti eskuela. Agtallopulo dagiti pamilia a pakaibilangen ti pamiliak.

Kasta met a pinagbakuitmi dagti agnaed iti Sitio Tomana nga adda iti tengnga ti taltalon. Masansan a malayusda dita ket amangan ta mapupokda iti panagadalem ti danum. Agduapulo a pamilia ti agnanaed a bin-ig nga agkakabagian.

Binaonko ti tallo a Barangay Tanod a mangabiso ken ni Ramon ken dagiti dua a kakaduana nga agbambantay iti lapat tapno pumanawda pay laeng sadiay gapu iti mabalin a panagdinakkel ti karayan.

”Ammomi ti ar-aramidenmi,” kuna kano ni Ramon kadagiti naibaon. Madama kano nga agtotong-itda iti kubo-kubo a nabangon iti igid ti lapat. Adda kano pay in-inumenda a kuatro kantos.

Iti kaudian nga impadamag ti PAGASA, nagbalin a signal numero tres iti Ilokos. Nagawanen ti koriente.

Sumurok a sangagasut dagiti lumugar a nagpaing iti eskuela Kaaduan ti ubbing. Adda pay dagiti masikog. Maysa kadakuada ni Dianne, ti Bikolana a naikamang iti ag-Manzano iti Sitio Tomana. Kabulananna kano. Uray ta adda met ni baket a mangpaanak no bilang ta mapanen ti ayonna nga agpasngay.

Timmawagak iti opisina ti City Disaster Coordinating Council. Impakaammok ti kaadda dagiti evacuees ti Baang Elementary School.

Apagtangep ti sipnget, kasla agpagungganen ti angin a dumaldaliasat, uray la a sumagawisiw a mangbasbasnot kadagiti natatayag a mula iti eskuela. Umatiberber met ti tudo a mangtattatek iti bubongan ti kuarto a ‘yanmi.

Aguppat ngatan nga oras ti limmabas ngem kaskasdi a napigsa ti angin ken tudo. Sa la kimmapsut idi agala unan iti rabii. Nalawagen a mangngeg ti panagsasaomi. Madamdama, adda dua a babbarito nga immay nangibaga a naganaken ni Dianne. Babai kano ti anakna. Urayak la a namurmurayan iti panagdungsak. Kasla nagbalin man a naisangsangayan ti rabii ta maysa a maladaga ti limtuad iti kangitingitan ti bagyo a naurana pay met ngarud a ditoy evacuation center.

”Korina ti nagan ti bagyo isu a Korina met ti maitutop a naganna,” kinuna ni Barangay Tanod Isko.

”Napintas a nagan! Kas kalasbang ni Korina Sanchez iti TV Patrol,” insaruno ni Kagawad Pitong.

”Agmaestranto no dumakkel ta mismo a ditoy eskuela ti nakaipasngayanna,” innayon ni Kagawad Ruben.

”Datayto amin ti ninong!” kinunak.

”Mabalin latta!” insungbat ni Kagawad Vicente.

Pumarbangonen. Namrayanmi ti nagkape ken nagkaremkem iti kornik. Innem a dadakkel a supot ti kornik a nayon ti sangakarton a noodles ken sardines ti  impatulod ti City Disaster Coordinating Council idi malem.

Bayat ti panagtutungtongmi, nadakamatmi ti maipapan iti lapat. Ditoy a naammuak a napan kano naki-derby iti pallot ni Ramon idiay San Fernando ken uray pay idiay Urdaneta. Isu met la gayam a di met laengen maituloy ti alad ti lapat!

”Sigurado nga agdinakkel ti karayan ita. Nalabit malapunos wenno masawang pay ketdi ti lapat,” kinuna ni Kagawad Loding. Inyunnatna ti nagtugaw apaman a nakaigup iti kape.

”Agtakias dagiti bangus ken tilapia. Adu la ketdi ti masigayan,” kinuna ni Kagawad Pitong a nangisakmol iti kornik.

”La ketdi, a! Dadakkelda kanon. Damagko nga agkalap ni Ramon iti umay a lawas,” insaruno ni Tanod Isko. Indissona ti tasa a nagkapeanna iti lamisaan.

 

AGLAWAGEN. Nakapsuten ti angin. Bimmattaway metten ti tudo. Nupay awan turogmi, inkeddengmi a pasiaren ti sibubukel a barangay tapno nakaaramidkami a dagus iti report a maidatag iti opisina ti City Disaster Coordinating Council.

Dua a grupo ti binukelmi. Idauluak ti agpaamianan. Ni met Kagawad Pitong ti agpaabagatan.

Pagat-tumeng ti danum iti kalsada nga agpaamianan. Agtatapaw dagiti nagduduma a bambanag. Adda nasalawmi a kalding a tumtumpaw. Danum amin nga aglikmut dagiti balbalay. Maysa a balay a nagadigi iti kayo ti nagirig. Sumagmamano met ti nabakasan ti atepna. Adda nagbissayot a linia ti koriente ta nailadan ti dakkel a sanga ti nagiray a logo.

Inteks ni Kagawad Pitong nga adda nagrissuod a paset ti sementado a kalsada iti abagatan ket nagbalinen a pagayusan ti danum.

Dinagasko a tinalawatawan ti balaymi. Awan grabe a dadaelna ngem nalasanglasang ti bikal nga alad.

Manggapun nga umbaas ti danum. Tartarakitik laengen ti tudo. Nalabit a no nakapagbayag ngata ti napigsa a tudo, di bumurong a mastreken ti danum dagiti bunggalo a balbalay. Awan ngamin ti kanal ti igid ti kalsada a pagayusan koma ti danum. Dayta ti maysa a parikutmi nga agserserbi iti barangay ta awan ti makaanay a badyet nga usarenmi nga agaramid iti kanal iti agsumbangir nga igid ti kalsada. Kanal laeng ngem umabot metten iti milion ti pategna a proyekto.

Tinurongmi ti karayan. Pudno ti atap ni Kagawad Loding nga agdinakkel ti karayan. Kapegges ti agusna kas ipalnaad ti napardas a pannakayanud dagiti kayo. Dimmanum dagiti talon a mamulmulaan iti mais. Manipud iti ’yanmi, dimi masaripatpatan ti lapat ta limned dagiti tambakna. Awan payen ti nabangon a kubokubo dita. Dimi masinunuo no nasawang ngem adda ketdi makitkitami a pagay-ayusan ti danum iti dayta a paset.

Kinitak dagiti kakaduak. Umarimpanasandan nga agtiliw kadagiti bangus nga agpisawpisaw kadagiti naipattopattok a pilaw. Pagam-ammuan, naglaaw ni Tanod Isko a nangayab kadakami. Dagus nga immasidegkami iti ’yanna. Itudtudo ni Isko ti maysa a bangkay a nagaburan iti lan-ak. Ti laeng ulona ti rumrummuar. Idi mabigbigmi, ni Ramon!®

MAKIPARTISIPAR! IBUTOS DAYTOY A SARITA ITI: RFAAFIL Reader's Choice Award Panagtultuloy a pannakaputar dagiti de-kalidad a sinurat ken panagrang-ay ni mannurat, ti GUMIL ken ti Literatura Ilokana ti panggep a ragpaten ti RFAAFIL Reader's Choice Award babaen ti ayat ken tulong dagiti rinibribu nga agbasbasa. Adu dagiti Ilokano a nupay saanda a mannurat ket mabalinda met ti tumulong a mangpasantak iti pagsasao a nariinganda a saan laeng a gagangay nga agbasa ken maliwliwa. Sangkabassit a tulongmo, Patgenmi nga Agbasbasa, napateg unayen a mangpadur-as iti Literatura Ilokana.

 

TI AUTOR: VIRGILIO S. NAUNGAYAN

NALPASNA ti Bachelor of Science in Elementary Education iti UNP-Candon. Nagserbi a Barangay Kagawad iti lugarda idi 1989-1994. Agdama a mangisursuro iti Darapidap Elementary School. Agnaed iti Candon City.

THE 1st ILOCANO WEBSITE FOR SHORT STORY AND POETRY WRITING CONTEST!