NANGABAK ni Virgilio S. Naungayan ti Candon City, Ilocos Sur iti Umuna a Gunggona iti Salip iti Sarita, iti topiko ti tao kontra nakaparsuaan, ti 7th Reynald F. Antonio Awards for Iluko Literature (RFAAFIL 2008-2009) babaen ti saritana a "Lapat." Nalpasna ti Bachelor of Science in Elementary Education iti UNP-Candon. Nagserbi a Barangay Kagawad iti lugarda idi 1989-1994. Agdama a mangisursuro iti Darapidap Elementary School.

Dagiti dadduma pay a nangabak:

Maika-2, Danilo B. Antalan ti Candon City, Ilocos Sur babaen ti saritana a "Ni Kanor ken Siak iti Taaw." Premiado a mannurat iti Palanca Awards ken RFAAFIL. Agdama nga agpapaay a reporter-announcer iti Tirad Pass Radio Television Broadcasting Network, Inc. as Radio Announcer-Reporter. Agsursurat iti salaysay, sarita ken damdamag iti Bannawag, Sirmata, Tawid News, ken Candon Times.

Maika-3, Efren A. Inocencio ti Batac, Ilocos Norte babaen ti saritana a "Sangapulo ket Tallo a Lagip iti Sakaanan ti Kapitakan a Tanem." Premiado a mannurat. Agdama a Master Teacher I iti Quiling Elementary School, Siudad Ti Batac, Ilocos Norte. Nangabak iti maika-3 a gunggona iti 6th RFAAFIL.

Maika-4, Reynaldo A. Duque ti Candon City babaen ti saritana a "Troso." Dati nga Editor-In-Chief ti Liwayway Magazine. Maikatlo daytoyen a pammadayaw a nagun-odna iti pasalip ti RFAAFIL.

Maika-5, Clarito G. De Francia ti Baguio City babaen ti saritana a "Pannubok iti Usok." Propesor iti University of the Cordilleras. Chairman ti Dept of Mass Communication, College of Arts and Sciences ti nasao a pagadalan. Nalpasna ti Ph.D. in Language in Education. Ingraduarna met ti Master of Arts in Education. Impempennan iti tallo a libro dagiti gapuananna: Balitok, Diamante, ken Pasiking. Nairaman met dagiti gapuananna iti Sarusar, Karit, ken Asin. Ibilangna a ti panagsuratan ti maysa a ramut ti balligina.

Dagiti naisalip a sarita: Dagiti Wallages iti Panagdaliasat ni Ama Dario ni Ped Sinar; Dalluyon ni Igid T. Baybay; Dagiti Suni ni Sony A. Sunni; Inton Umbaas ti Sipnget ni Raniag T. Laoag; Ti Dallang, ti Pakkong ken ti Tallak ni Bucloc Alilem; Dagiti Naamitan ni Rob Rabii; Sangapulo ket Tallo a Lagip iti Sakaanan ti Kapitakan a Tanem ni Aoanan Penem; Bantay Gidday ni Sika T. Gapuna; Ni Kanor ken Siak iti Taaw ni Mangngalapak; Isla Sta Cruz ni Nali T. Aw; Dagiti Naitanem a Kinadayag ni Rayania; Alimunmon ni Salucag T. Mangngalap; Parola ni Napateg A. Linglingay; Pannubok iti Usok ni Fely T. Pinili; Dagiti Espiritu iti Bakir-Bato ni XL; Troso ni Roman Antonio Dignos; Lapat ni Amante A. Almirante; Ti Pangen ni Agaton Bisaya; Kuko ti Sawi iti Barukong ti Rabii ni Gabriel de la Cruz; Princess Cruises ni Pasa H. Ero; Bannuar ni Salba T. Biag; ken, Disierto ni Dolly Asat.

Dagiti naghurado: Francisco T. Ponce, pangulo; kameng da Juan Al. Asuncion ken Joel B. Manuel.

Maidasar dagitoy nangabak a sarita kadagiti agbasbasa tapno pilienda ti mapadayawan iti RFAAFIL 2009 Reader’s Choice Award. Mairakurak dagiti pagannurotan para iti pannakipartisipar iti Reader’s Choice Award iti website a www.rfaafil.com a pagtaengan ti RFAAFIL iti Internet.

Napadayawan dagiti nangabak bayat ti maika-41 a Komperensia Nasional ti GUMIL Filipinas iti Our Lady of the Angels Seminary a naangay idi Abril 11-12, 2009. Napadayawan pay ti nangabak iti RFAAFIL 2008 Reader’s Choice Award a sarita a "Ken ni Pidut: Dagiti Daton iti Angep" a sinurat ni Joel B. Manuel ti Banna, Ilocos Sur.®