NAPADAYAWAN ni Roy V. Aragon ti Iguig, Cagayan iti Umuna a Gunggona iti Salip iti Daniw, iti topiko ti tao kontra nakaparsuaan, ti 7th Reynald F. Antonio Awards for Iluko Literature (RFAAFIL 2008-2009) babaen ti daniwna a "Baribari Kontra Bisin, Tig-ab Kontra Gawat: Dallang iti Nakaparsuaan ti Bagas." Premiado a mannurat. Naipasngay iti Mabasa, Dupax del Norte, Nueva Vizcaya ngem agnaed ken ti pamiliana iti Cagayan. Agdama a part time freelance computer specialist, web consultant ken editorial consultant. Imatonanna ti www.dadapilan.com. Daytoy ti maikadua a daras a mapadayawan iti umuna a gunggona iti pasalip ti RFAAFIL.

Dagiti dadduma pay a nangabak:

Maika-2, Benjamin P. Pacris ti Vigan City babaen ti daniwna a "Tedted ti Dara ti Daniw iti Nagbenditaan a Bangabanga." Premiado a mannurat iti daniw ken ababa a sarita. Lecturer iti Literary ken Jounalism Seminars para kadagiti kameng ti GUMIL, campus journalists ken mediamen. Nag-presidente ti GUMIL Ilocos Sur idi 1996-1997. Agdama a Business Manager ti GUMIL Filipinas. Isu ti chief information officer iti Philippinme Information Agency iti Ilocos Sur. Nag-Manager iti PIA iti Ilocos Norte ken Laoag City. Tubo iti Laoag City ngem agnanaeden ken ti pamiliana iti siudad ti Vigan. Agdama nga Admin. Officer iti University of Northern Philippines iti Vigan ti kaingungotna.

Maika-3, Benjamin P. Pacris ti Vigan City babaen ti daniwna a "Baribari ti Nabatbatian nga Ipes iti Payugpog ti Armageddon." [Iti pagannurotan ti pasalip, mabalin a mapadayawan ni mannaniw iti dua a gunggona.]

Maika-4, Clarito G. De Francia ti Baguio City babaen ti daniwna a "Kiddaw-Pakaasi ti Goldfield." Propesor iti University of the Cordilleras. Chairman ti Dept of Mass Communication, College of Arts and Sciences ti nasao a pagadalan. Nalpasna ti Ph.D. in Language in Education. Ingraduarna met ti Master of Arts in Education. Impempennan iti tallo a libro dagiti gapuananna: Balitok, Diamante, ken Pasiking. Nairaman met dagiti gapuananna iti Sarusar, Karit, ken Asin. Ibilangna a ti panagsuratan ti maysa a ramut ti balligina.

Maika-5, Agustin DC. Rubin ti Subic, Zambales babaen ti daniwna a "Mariknak ti Saem Dagiti Agarubos a Luam, Nanangko!" Nalpasna ti Bachelor of Science in Industrial Education iti UNP-Vigan City. Sangapulo ket lima a tawen a nangisuro iti Asinan Elementary School ken Olongapo City National High School. Nagretiro a nangisuro idi 1985. Adun ti naapitna a pammadayaw iti panagsuratan iti sarita ken daniw. Isu ti umuna a napadayawan iti RFAAFIL Reader's Choice Award.

Dagiti naisalip a daniw: Baribari Kontra Bisin, Tig-ab Kontra Gawat: Dallang iti Nakaparsuaan ti Bagas ni Desaparecido; Allawig ni Tengnga T. Daga; Saluadantay' 'Toy Pagtaengan nga Impaay ti Namarsua ni Ozone L. Ayer; Kimat ken Gurruod ni Dy Mabales; Mariknak ti Saem Dagiti Agarubos a Luam, Nanangko! ni ‘Toy Anakmo; Bantay ni Bakir Rikab; Tedted ti Dara ti Daniw iti Nagbenditaan a Bangabanga ni Laong Laan T. Padsan; Napateg a Lubong ni Miss Earth; Maibasura ti Nailaw-an a Nainaw a Biag ni Abor Si. Onista; Sagawisiw ni Uni T. Kuriat; Baribari ti Nabatbatian nga Ipes iti Payugpog ti Armageddon ni Eksodus Thaddeus; Anniniwan, Agsardengkayon nga Agisalog ni Napakumbaba A. Kanayon; Dagiti Bantay Idiay Bagani Ubbog ni Juan Dragon; Panangpasangbay iti Niebe ni M. Jeremy Castillo; Ti Tao a Nangkarit iti Bagyo ni Bagyo A. Nadawel;

Lakay Warawara ni Taong Grasa; Kibinenka Ita a Kalgaw ni Porong A. Nalambong; Ngariet ti Lunod ni Napateg A. Linglingay; Dika Agbakuit ni Kenn Santa Ana; Ballaag ni Sagawisiw T. Sagat; Kiddaw-Pakaasi ti Goldfield ni Minero Moreno; Diakton nga Agsubli Pay ni Yo Patingyo; Karit ti Napalabas ni Jhergo C. Pardz; Kimmadena a Tadem ni Salidum-ay; Paraiso iti Lansad ni Lapulapu Ma. Gellan; Walo-walo ni Carayo; Dung-awanka, Dan-aw Daytoy Dagak ni Dukesa A. Napili; Sarmingnan Naburaken ni Faith Angel; ken, Dinton Maulit Dagem Kalman ni Rosa Monte.

Dagiti naghurado: Ariel S. Tabag, pangulo; kameng da Joel B. Manuel ken Daniel L. Nesperos.

Maidasar dagitoy nangabak a daniw kadagiti agbasbasa tapno pilienda ti mapadayawan iti RFAAFIL 2009 Reader’s Choice Award. Mairakurak dagiti pagannurotan para iti pannakipartisipar iti Reader’s Choice Award iti website a www.rfaafil.com a pagtaengan ti RFAAFIL iti Internet.

Napadayawan dagiti nangabak bayat ti maika-41 a Komperensia Nasional ti GUMIL Filipinas iti Our Lady of the Angels Seminary a naangay idi Abril 11-12, 2009. Napadayawan pay ti nangabak iti RFAAFIL 2008 Reader’s Choice Award a daniw a "Taguob" a sinurat ni Giovanni L. Palomares ti Quezon City.®