ADU dagiti surat a maaw-awat iti E-lokano Mail ket maysa kadagitoy a surat ti saan a palabsen gapu iti kinapateg ti nagunegna. Surat a naggapu iti maysa a mannurat a saanmi a dakamatenen ti kinasiasinona. Daytoy a surat ket maipanggep iti Resulta ti Salip iti Daniw ti 7th RFAAFIL [2008-2009].

Dear Reynald:

Naimbag nga aldawmo! Tarabayennaka latta koma ni Apo Dios, kasta met ti pamiliam. Agtalinaed latta koma a nabaked a munmon ti inrugim a pasalip. Daytoyto ti agbalin a batonlagipmo ken ti pamiliam iti masakbayan.

Nabasak daydiay daniw a nangabak iti Umuna a Gunggona iti napalabas a pasalipmo iti daniw (2008-2009), ti "Baribari Kontra Bisin, Tig-ab Kontra Gawat: Dallang Iti Nakaparsuaan Ti Bagas".

Saankon nga ibaga a napintas. Nakednganen dagiti hurado a daytoy ti kapintasan nga apit iti RFAAFIL Salip iti Daniw 2008-2009.

Nupay kasta, adda laeng dillawek iti pannakaipatungpal ti pagannurotan ti pasalip.

Iti paglintegan ti pasalip, mabasa dagitoy:

2. Agatiddog ti daniw iti di ab-ababa ngem 20 a linia ken nakakompiuter wenno naimakinilia iti maysa a panid ti bond paper....

6. Saan a mabalbaliwan ti pangngeddeng dagiri hurado. Maibabawi ketdi ti premio ti mangabak no matakuatan kalpasanna a linabsingna ti Pagannurotan Bilang 2.

Agmamata a linabsing ti daniw ti Pagannurotan 2 ta saanna a tinungpal daytoy. Uray ania ti aramidem, saanmo a maiserrek nga imakinilia iti maymaysa a bond paper ti kaatiddog ti "Baribari..." Ditoy pay laeng, nadiskualipika koman ti daniw.

Ngem pinangabak daytoy dagiti hurado. Awanen ti maaramidan iti dayta ta pinal la ngarud ti desisionda. Ngem gapu met laeng iti daytoy, uray isuda met, naglabsingda met ta saanna a tinungpal ti pagannurotan. Malaksid no adda bendisionmo a kas sponsor tapno maaddaanda iti karbengan a mangbalbaliw kadagiti pagannurotan ti pasalip. No kastoy man ti napasamak, makunak a saan a nasayaat a debelopment dayta para iti pasalipmo.

Insuratko daytoy iti nagan dagiti dadduma pay a nakisalip a nangtungpal kadagiti pagannurotan. Kas itay kunada iti Ingles, to do justice to them. Iti ania man a pasalip, ti panangtungpal kadagiti pagannurotan ti pasalip ti umuna a pagsasalipan. Madiskualipika dagiti dina ammo ti agtungpal kadagiti nayetnag a paglintegan.

Naimbag nga aldawmo.
Nagan ti Mannurat

Daytoy ti kompleto a naglaon ti surat, awan surok ken awan kurangna. Nabatad ken nalawag dagiti argumento nga imbuksilanna. Masirayanmi ti kinatakneng ti kinatao ti nagsurat. Saanna a dinakamat ti nagan ti nangabak a mannurat no di ket ti daniw ti pinuntiriana.

Idi maawatmi daytoy a nga e-mail, nasdaawkami unay gapu ta saanmi met pay a naipablaak ti daniw ditoy rfaafil.com. Saan met a hurado daytoy a mannurat ta nakitana koma ti daniw. Ngem naanagmi a mabalin nga impablaaken ti nangabak a mannurat ti daniwna iti tartarawidwidanna a website. Agpapan ita, saanmi pay a nabasa no sadino ti nakaipablaakanna.

Ammomi a sensitibo daytoy nga isyu, isu a personal nga indatagmi daytoy nga e-mail iti chairman dagiti hurado. Iti verbal a pannakipatangmi ken pannakiinnumanmi, naammuanmi a maibabawi ti pammadayaw kas desision dagiti hurado. No naipablaak ti Bannawag ti pannakaibabawi ti premio ti Umuna a Gunggona iti Salip ti Daniw ti 7th RFAAFIL, patienmi unay a saan a nagpugpugto ti pagiwarnak no di ket adda met laeng basbas wenno pammalubos a naggapu kadagiti hurado.

Saanmi pay a sinuratan dagiti maseknan - ti mannurat a nangabak ken ti mannurat a nagsurat kadakami. Kayatmi nga alaen ti opisial a panig dagiti hurado tapno malawlawagan daytoy a pasamak.

Awisenmi dagiti agbasbasa nga agsurat kadakami no adda dagiti bambanag a kayat a malawlawagan wenn kayat nga iburay. Iturong laeng iti admin@rfaafil.com wenno rfaafil@hotmail.com.®