ADTOY ti surat a naawatmi iti petsa ti Setiembre 8, 2009 a naggapu kadagiti hurado. Napauluan ti surat iti PALAWAG TI PANGULO TI HUNTA DAGITI HURADO MAINAIG ITI PANNAKAIBABAWI TI PREMIO TI UMUNA A GUNGGONA ITI SALIP ITI DANIW ITI RFAAFIL 2009.

Idi naawatmi dagiti elektroniko a kopia dagiti dandaniw, addan dagiti nadiskualipika (a dandaniw), wenno saanen a kompleto dagiti naipama kadakami a dandaniw base iti listaan ti naawat ti secretariat — malaksid kadagiti paulo dagiti dandaniw (a kompleto).

Ngarud, inyabagan ti sponsor/secretariat ti annongen a panangdiskualipika kadagiti sumagmamano nga entries base iti teknikal a pagalagadan-- a base met ti akemmi a secretariat iti sumagmamano a pasalip, kastoy met ti ar-aramidenmi.

Ken ngarud pay, inarisitmi dagiti naidatag a dandaniw base iti naited a tema ken iti merito dagiti dandaniw. Ket iti dagupmi a hurado, inyalat ti "Baribari Kontra Bisin, Tig-ab Kontra Gawat: Dallang Iti Nakaparsuaan Ti Bagas" a daniw ni Roy V. Aragon ti umuna a puesto.

Napadayawan dagiti nangabak bayat ti maikadua nga aldaw ti Maika-41 a Kombension Nasional ti GUMIL Filipinas, idi Abril 12, 2009 iti OLAS, Novaliches, Quezon City. Nupay saan a nakadar-ay iti awarding ni Apo Aragon, nayawat ti awardna iti nagpresenta a pannakabagina iti nasao a pasken.

Iti maudi a lawas ti Mayo a panagbakasion ni Apo Reynald A. Antonio, sponsor/secretariat ti RFAAFIL, dinakamatna ti kaadda ti e-mail-protesta mainaig iti nadakamat a daniw

Napagdidinniskusionan ngarud ti nasao nga e-mail, kaduami dagiti dua pay a hurado — da Appo Joel B. Manuel ken Daniel L. Nesperos. Ket naikeddeng a maibabawi ti premio ni Apo Roy V. Aragon iti teknikal a rason nga imbaklay ti sponsor/secretariat nga annongen.

Inkeddengmi ngarud a hurado a nupay naibabawi ti premio ni Apo Aragon base iti teknikal a rason, saan a masuktan ti puestona nga umuna ta idi nagarisit/nagranggokami a hurado kadagiti naisalip, inikkatmin iti abagami dagiti teknikal a pagalagadan ta inannong la ngaruden ti sponsor/secretariat.

Kasta met a napagnunumuan a ti esponsor/secretariat ti mangidanon ken ni Apo Aragon ti nasao a pangngeddeng gapu ta annongenna daytoy, kas kadagiti annongen a panagawat iti entries ken panagipakaammo mainaig iti salip a saan ket a kadagiti hurado.

Ladingitenmi daytoy a pagteng ket dumawatkami iti dispensa iti ania man a pannakaburibor nga impaayna iti publiko, kadagiti nakisalip, ken kadagiti nangabak, kangrunaanna ken ni Apo Aragon.

ARIEL S. TABAG
Pangulo, Hunta Dagiti Hurado
Salip iti Daniw, RFAAFIL 2009
Agosto 31, 2009.®