NAIRANTA daytoy a surat nga agpaay ken ni Apo Roy V. Aragan, ti nangabak iti Umuna a Gunggona iti Salip ti Daniw ti 7th RFAAFIL [2008-2009] iti tema ti tao kontra nakaparsuaan. Nairanta pay nga irakurakmi iti daytoy pagtaenganmi tapno mabasa ti maseknan ken tapno iburaymi metten kadagiti mannurat a nakisalip ken kadagiti agbasbasa.

Patgenmi a Mannurat,

Maladingitankami a mangipakaammo kenka a naibabawi ti pammadayaw ti daniwmo a nangabak iti Umuna a Gunggona iti Salip ti Daniw ti 7th RFAAFIL [2008-2009] iti tema ti tao kontra nakaparsuaan. Daytoy ti pinal a desisionmi. Nasken a surotenmi ti pagannurotan - a ti desision dagiti hurado ti matungpal. Nasken a surotenmi ti napagnunumuan a pangngeddeng dagiti madaydayaw a hurado.

Pagrebbenganmi ti mangipakaammo iti daytoy a pannakaibabawi ti premiom ngem saanmi a naipakaammo kenka iti husto a panawen. Pakawanennakami no saanmi a naibaga a dagus daytoy a banag kenka. Ladingitenmi unay a naammuam nga immuna daytoy iti sabali - ti Bannawag. Adtoy ngarud a dumawatkami iti naan-anay a dispensa wenno pannakaawatmo iti daytoy a nagkamtudanmi.

Patienmi a nasakit kenka ti pannakaibabawi ti pammadayawmo. Nasakit met unay ti riknami a mapasamak daytoy kenka a di inggaggagara. Maluksawkami unay - kas maysa nga esponsor, kas maysa a kabsat iti pluma ken kas maysa a pagayam - iti daytoy a pasamak.

Kadagiti babak ken panagbiddutmi - iti naladaw a pakaammomi kenka - akuenmi amin ida. Pakawanennakami iti daytoy a nagkamtudanmi.

Sapay koma ta dinto agbalbaliw ti pannakilangenmo kadakami. Sapay koma ta agtultuloyto latta ti pannakitinnaktakunaynaymo kadakami. Sapay koma ta agnanayonto latta ti panangsupsuportam iti pasalipmi ken iti panagrang-ay ti literaturatayo.

Naimbag nga aldawmo!

'Toy Mangipatpateg,
RFAAFIL.®