|
REYNALD F. ANTONIO AWARDS FOR ILUKO LITERATURE |
|
|
Ti Pagannurotan ti RFAAFIL iti Pasalipna
Setiembre 24, 2009 |
|||||
|
NASURAT ti pagannurotan ti pasalip ti RFAAFIL iti naun-uneg a panangimutektek, saan a basta nagkopia kadagiti immun-una ngem iti isu nga agpasalip. Pagannurotan a maisupadi kadagiti immun-unan a pagannurotan. Pagannurotan a nangabaruanan ken nangpalag-an. Daytoy ti pundasion ti pannakaimaldit ti pagannurotanna. Nangabaruanan ti pagannurotanna idi mangted iti tema ti pasalipna. Idi damo, nakibur dagiti mannurat nga agtungpal iti tema. Immilet ti pagdakiwasan ti panunot ni mannurat iti suratenna gapu iti tema ngem limmag-an ti panunotna ta nakadiaya a dagus ti suratenna. Nangabaruanan pay ti pagannurotanna ta agawat kadagiti pakisalip babaen ti e-mail. Daytoy a wagas ket naisupadi ken narugian iti pasalipna. Asino ita ti madi mangayat a mangipatulod ti pakisalipna babaen ti e-mail? Dagidiay ngata naanus pay laeng nga agusar iti makinilia. Nangpalag-an ti pagannurotanna ta saanen a dumawat iti uppat a kopia no ipatulod ti pakisalip iti elektroniko a wagas. Saanen a nangednged iti wagas ti pannakaisuratna. Saan payen a dumawat iti ladawan ti makisalip. Alisto a maawat ti pakisalip babaen ti e-mail. Awanen daydiay dakkel a panagamak amangan no saan nga umabot iti panagtapos ti salip. Ti pagannurotan ti RFAAFIL ket nasangal iti dua a panangimutektek – agpaay a para iti mannurat ti maysa ken agpaay a para iti Secretariat ti RFAAFIL ti maysa. Ti pagannurotan a para iti mannurat ti sursuroten dagiti hurado iti panaghuradoda ket ti pagannurotan a para iti Secretariat ti sursuroten ti RFAAFIL iti pasalipna. Nauy-uyong dagiti hurado iti pannakaipatungpal dagiti pagannurotan para iti mannurat no idasig iti sekretariat ti RFAAFIL iti pannakaipatungpal dagiti bukodna a pagannurotan. Nupay gagangay a mannakaawat ti RFAAFIL kadagiti pagannurotan, mannakaawat laeng kadagiti dadduma ngem estrikto met kadagiti dadduma a pagannurotan. Nupay makuna a mabalin a madiskualipika ti nakisalip no saan a sumurot iti pagannurotan, daytoy ket pagannurotan nga usaren ti sekretariat. Kas iti pasalip ti sarita, uray awan palawag no apay a nasurat ti nasarita, saan a diskualipikaen ti RFAAFIL ti entry. Uray awan ti ababa a pakasaritaan ti biag ni nakisalip, iyawat latta ti RFAAFIL ti entry kadagiti hurado basta ammona ti kinasiasino ti nakisalip. Saan a makibibiang ti RFAAFIL kadagiti pagannurotan a para kadagiti mannurat, a sursuroten dagiti hurado iti panagpili kadagiti mapadayawan a sarita. Makibiang ketdi iti kinasiasino ni mannurat ken iti deadline ti pasalip. Naiget unay a sursuroten ti RFAAFIL ti pannakaammo ti pudno a nagan ti nakisalip ken ti pannakatungpal ti deadline ti pasalip. Saannan nga iyawat kadagiti hurado: (1) ti entry a naawat kalpasan ti deadline; ken, (2) ti entry a dina mainaganan ti mannurat a nakisalip. Dagitoy dagiti dua a saksaklawenna iti panagarisitna kadagiti naisalip. No mabirokanna dagitoy a dua, agbalin nga opisial ti entry ket ipaimana daytoy kadagiti hurado. Saanna pulos a pinakibiangan wenno pakibianganto ti linaon ti entry ta inted wenno it-itedna daytoy a pagrebbengan dagiti hurado. Manipud iti tawen 2002 nga immuna a nasurat ti pagannurotan agingga ita a tawen 2009 [maikawalo a tawenen a panagpasalip], daytoy pay laeng ti sursurotenna. Ita, a maikawalo a tawenen ti RFAAFIL iti lubong ti panagpasalip, dimtengen ti panawen a matenneb ti sinangal ken tinawen nga inurnosna a pagannurotan. Idi, adda dagiti naisalip a nagsobra iti panid ket diniskualipika a dagus dagiti hurado apaman a natakuatanda daytoy a naglabsing. Ita, adda naisalip a nagsobra iti panid ket maibabawi ti gunggona kalpasan a napadayawanen gapu ta natakuatan a naglabsing. Daytoy ti mangipaneknek a saan pulos a pakibiangan ti RFAAFIL ti naguneg dagiti maisalsalip. Nupay adda karbengan ti RFAAFIL nga agdesision iti pasalipna, respetarenna unay ti pangngeddeng dagiti huradona. It-itedna kadakuada ti karbengan a mangtingiting wenno mangpili kadagiti mapadayawan a sinurat. It-itedna kadakuada ti karbengan a mangbalbaliw wenno mangbennat wenno manglimita iti pagannurotan no la ket agbalin a patas dayta a pamuspusan kadagiti nakisalip. |
Idi nagdesision dagiti hurado nga imbes a sangapulo dagiti mapadayawan ket lima laeng, rinespetar ti RFAAFIL dayta. Nailut ngarud ti pagannurotan tapno adaptaren daytoy a bilang dagiti mapadayawan. Iti kallabes a pasalip, nadlaw manen a mabilbilang dagiti mapadayawan koma, isu a narebisa manen ti pagannurotanna tapno madakamat a mabalin a maksayan dagiti mapadayawan depende iti pangngeddengda. Naannad a sangalen ti RFAAFIL dagiti pagannurotanna. Kitkitaenna ti pateg ti tunggal balikas iti limitado nga espasio. Adda bukodna nga interpretasion no ania ti sapsapulenna iti pagannurotanna. Ngem sinangalna ketdi dagitoy nga annuroten tapno mapalag-anan ti abaga dagiti mayat a makisalip. Kalpasan ti resulta ti pasalipna iti daniw para iti 7th RFAAFIL, iti naunday a panawen sipud nangrugi, masubok ti kaipapanan ti maysa a paset ti pagannurotanna – Agatiddog ti daniw iti di ab-ababa ngem 20 a linia ken naikompiuter wenno naimakinilia iti maysa a panid ti bond paper. Apay a naaramat ti RFAAFIL dagita a balikas? Ania ti pampanunoten ti RFAAFIL idi ikur-itna dagita? Manen, ditoy a makita ti tugotna a mangpalag-an kadagiti maseknan. Ti mangted iti wayawaya ken ni mannaniw iti kinaatiddog ti daniw daytoy. Wayawaya, kuna ti RFAAFIL, ta awan detaliado a wagas iti pannakaisuratna basta sumrek iti uneg ti maysa a panid ti bond paper. Saan a nagdakamat iti klase ti font, size ti font, size ti papel, margin, ken ti wagas a pannakaisuratna – paidda wenno patakder, one column wenno two columns. Ti ammo ti RFAAFIL, nangted iti pakapalag-anan ken ni mannaniw. Nupay iti sabali a bangir, nangedngedan ketdi ni mannaniw ta nasken a di ab-ababa iti 20 a linia ti daniw ken nasken nga umuneg ti daniw iti maysa a panid ti papel. Mabalin unay nga iyan-anay nga ipastrek ti daniw iti las-ud ti maysa a panid. Ania kadi ti pateg iti RFAAFIL daytoy maysa a panid a daniw? Kayatna met a saan a marigatan ti bagina iti panangpaadu iti kopia [panagxerox copy] kadagitoy a daniw. Ta no adgua a panid ti daniw, marigatan la ketdi aglalo no awan header ti sumaruno a panid. [Kadagiti entries a maaw-awatna, nubenta porsiento dagiti awan title header, singkuenta porsiento dagiti awan ti numero dagiti panid. Saan a basta inaramatna dagiti balikas a nasken nga umuneg ti daniw iti maysa a panid ti papel. Kayatna a one-page one-entry tunggal daniw nangruna ket mabalin a dua ti isalip ti tunggal mannaniw. Iti daytoy a wagasna, mapalag-anan met dagiti paghuraduenna a mangiggem iti maysa a daniw iti maysa a panid. Napateg unay ken ni RFAAFIL dagiti pagannurotan. Nasken a takderanna dagitoy. Iti naminsan, a panagbiddut iti naipablaak a petsa ti panagngudo ti pasalip, sinurotna dayta a petsa tapno saan a matikaw dagiti makisalip. Ti deadline ti maysa kadagiti dua a pagannurotan a pakaseknan unay ti sekretariatna. Maikadua ti kinaadda ti identity ti nakisalip. Tunggal iyawatna kadagiti hurado dagiti naisalip a daniw, kas idi iyawatna kadagiti hurado iti 7TH RFAAFIL, dagitoy a dua ti sapsapulenna. Pakabasolanna kadi no adda lumsot nga agsobra iti maysa a panid nga entry kadagiti imana? Pakabasolanna kadi no ikkanna iti gundaway dagiti amin a nakisalip, a nangsurot iti kriteria ti sekretariat, a dumanon ti sinurat dagitoy iti ima dagiti huradona? Iti namin-adu a pannakausig wenno pannakapalapal iti kredibilidad ti pasalipna, maragsakan unay ti RFAAFIL ita, babaen ti pagannurotanna partikular iti daniw, naaddaan iti napintas a gundaway a mangipampaneknek nga iti kaano man, saan pulos a nakibiang iti pannakapili dagiti sinurat a padayawanna. Maragsakan unay ti RFAAFIL a mangipakita nga awan ti kalkalubanna, nga awan ti kankanunonganna. Kayatna nga agdalan amin iti patas a laban tapno mataginayon ti kredibilidad ti pasalipna tapno agpaut ti biagna iti panggep a mangpadur-as iti Literatura Ilokana.®
|
||||
|
THE 1st ILOCANO WEBSITE FOR SHORT STORY AND
POETRY WRITING CONTEST!
|
|||||
All Rights Reserved