Inlaem ni Nostradamus ti nagpartaan a kambas
Ti nakaparsuaan iti tunggal burburtia ti salamangka
Ta daytoy ti langsi ti napespes a linteg maikaranukon
Iti gayung-gayong a di agtandaan ti padeppa.
Umaningaas ti segged dagiti buli iti payubyob
Sungani ti inaw ti narames a birhen a di nagalimpatok
Maisaklang kad’ ti bileg ti tadem iti pangukoman?
Aglagto kad’ dagiti nasinuro nga umagep iti langit?
Makapaseggar dagiti taul a kimleb iti dulang
Di pay ipaltiing trumpeta ti propeta
Ti mangliliput a dayyeg ti bioleta a raya.
Nagmaskara ti kalsada nga inabungotan ti anglem
Sumarut aglatlati a payugpog ti paktoria
Agngangabit ti nangkamat maudi a darepdep
Nakset ti payak ti anghel iti alipaga ti temtem
Bambanti ti apog ti agtantandok a karkarma
Nagkuripaspas ti alimatek a nangsepsep tetanu’t linnaaw
Kinapon ti berdugo’t ramut ti metapora
Inalun-on ti agmatuon naglinong nga anniniwan
Nayappan aritos ti ariwanas a kinawit ti bandos
Atang ngata ti nuclear iti laem dagiti mannakabalin?
wenno an-anib ti bileg a nangadipen ti aglawlaw?
Puypuyotan dagiti nagipus ti landok nga anguyob
Sinan-kumpay dagiti asuk a nangpayugpog ti law-ang
Umarinebneb dagiti nakutiman a bagas
Ti buyuboy a dina mapanyangan dung-aw ti siglo
Kas iti limned a layap a sinaplitan ti allawig
Dagiti makipilpila iti sangarakem a tinukel
Dida maisaang dawa ti binuot nga agamang
Bakunaanda payen ti agulser a sarsaraaw
Mamandar ngata ti salamangka ti puligos
Ti maul-ulaw a lubong ta dumsaag dagiti didiosen?
Ti an-anito itangkalna ti nabatbati a sallapingaw
Nga agdeppel iti titulo ti sakaenna a daga
Uray isaldana’t kararuana iti gabat ti atong
Nagpanesen ti balitok a kambas dagiti naulod-ulod
Ken naapag-apag a bangkay iti spollarium
Nagtalipuagaw ti salaksak iti napingawan a sagumaymay
Agdardara ti kapisi ti lenned a bulan.
(Ah, ti ipes ti tidtidda ti Armageddon!)