"Poesus est vinum daemonum." (Poetry is devil’s wine.)
- St. Augustine, Contra Academicus, Sec. 1

(i)
paingelek man daytoy dara ti daniw iti bangabanga
a pagbenditaan dagiti nagpayak a di makasaklang
ta nabantot ti bareta ti gamrud nga agkallautang
ar-arub-uben ti di mabmabsog a nagipus a pangilan
natublak ti lubong iti bariwengweng ti panawen
dagiti tangtangaden a naulaw ti bileg a nangsukmon
bara ti agmatuon a nangkariar naalisan a malem
ta agduldul-o, agbasingbasing ti nakaparsuaan.

(ii)
ibisibisko’t bendita ti daniw iti parparaangan
a mangsuma ti agraira a gita ti agkuerong
a ritmo ti agngangabit ken natil-i a sirkulo
ah, dagiti puraw pinasuksukanda ti gilap
ti kumawit a sima ti bayanggudaw a santilmo
dagiti immasete nga angep nga impultit ti oligarkia
a nangmilat iti tangatang ti apokalipto a mangsumar
kadagiti rapas a dakulap ni midas a nangkutkot
balangkantis a rimat iti laem ti bullalayaw
ngem apay a dida matugkelan ti orasion ti mammadto?
agkatangkatang ti pasion ti alimbasagen a bannatiran
a di makaumok iti puon ti kaputotan
nakipagpingki ti rissik ti kikir ti kumpay
a nangalas-as ti atang ti nagmanto a langit.

(iii)
pespesek ti daniw iti nagbenditaan a bangabanga
tapno sumagepsep iti mawaw a tangkiran a bingkol
a tubuan ti bugbugtong a ruting iti disierto
ti aggitgiteb a barukong ti kayumanggi a daga
a pinadapoda iti anglem ti pulbora ken sinuro
aray tiplak laeng ti tarakitik a litania
a manglinnaaw ti natikag ken nagmawmawen
a leyenda ni lam-ang iti karayan amburayan
di met natuba dagiti lames iti kabkab ti dinamita?
di nagtulid ti babato a sinepsep ti igges iti lumot
di met tumbog ti nagminasan a suso ni aran
a nagkumotan idi dagiti an-anabo ni angalo?
ah, napirsapirsay ti kararua ti dallang iti payao

(iv)
warisan ti bendita ti daniw dagiti mangrabrabii
a nangaradas ti ginginammol ken tagiruot
ti nakaparsuaan a didaman nagbaribari
a timmangad a nagkurus iti dapo
ipatedtedko ti dara ti daniw a mangkilnog
ti bangabanga nga in-inapet dagiti di-katatawan
pagkallautangek ti naalikuteg a kararua