"Our task must be to free ourselves by widening the circle of compassion to embrace all living creatures and the whole of nature in its beauty." - Albert Einstein

Lussolussoken dagiti laslasag a dinerder dagiti bungbong
ken maso a mabisin iti pennek ti aggagatel, immagila
a kalikagum. Maangsanen iti alingasaw ti asido
a kibkib ti lidem, kasta met nga umas-asimbuyok ti merkurio
a mangilasin iti baknang ken marigat a raya.

Saanen a makadaer ti kudil a mamagtalinaed
iti sigud a ngayed ta gumurguran dagiti gawed
a mangal-alay-ay iti kettang dagiti Anito ken mito
nga agtaytayaw iti kapayawan ken makiginginnuyod
iti bullalayaw a nagarko iti Kamposanto Kordillera.

Aglayusen iti dara ti agan-anangsab a modernisasion
a kumamkamat iti awanan konsensia a nam-ay
uray agluplupiasen iti Ambuklao iti nayatang
a kararag dagiti mambunong a tapey ken mama
ngem saan latta a mangngeg dagiti bulul ti arikiak
dagiti mapikpikan a sagut ken sugat.

Dagita ti dungdung-awan a gasang dagiti gangsa
a mangidaydayeng iti sainnek ti panagkedked
iti agmagan a Karayan Agno. Aglaylayen dagiti
sabong ti marapait, saleng ken everlasting
gaput’ danag ni Bantay Pulog nga aggidgiddayen.

Agkidkiddaw dagita iti dakulap nga addaan puso
Makikaasi ti luada a marikna koma ni Maknongan.