Lumlumduok ti karabukob ni Satur
     A mangtiltilmon ti dara ti kassaur.

Agtungtunglab ti darikmat
Ta paypayapayan naugotan a karayan
Iti silud aggargarakgak a lunod...

Agbusi ti ngipen ti ragadi
A mangrusod ti lamulamo a turod
Iti allawig sellang ti ladingit...

Ikkis ti daga agtutukel nga ima
Dalipawen nakusbo kalapaw narungdo
Rapas a dakulap napasag nga oras...

Kusilap ti darang iti tangatang
Gil-ayab ti dara sangalubongan a kararua
A manguram agnguynguy-a a sardam...

     Agbukbukirad ti puseg ni Moris
     Barbakua a lasag tig-ab ti rissik.

Ipus ti agus kugtar ti layus
Ta sinippit ti isip agtabtabbuga a pait
Nagsima a dila mabisin a bituka...

Pinisang ti dinamita ti bakrang
Ket nauyos paragpag sa saibbek sumayag
Nabulsek ti taaw kimsiw ti alimbadaw...

Agrengrengngat ti mawaw a lasag
Gayebgeb ti dagaang ket law-ang napisang
Mata ti arbis kimleb iti puseg ti langit...

Agdirdiram-us ti bulan a kabus
Iti daradara nga angin iti tabatab a muging
Naikanbas a rupa iti lua ti agsapa...

     Umang-anges ni Magdalena
     Kadagiti lamulamo maris a bombilia.