1. Paulo ti Sarita --- Kanta Iti Sab-ok iti Agpakada a Malem - tumutop la unay ti paulo ti sarita, ta ngamin ti kaipapanan wenno pakaiturongan ti husto a paulo ket ti masarsarita wenno ti germs ti sarita.

Iti sarita, adda ti kanta a nangirugian ni author ti saritana. No rumuar tunggal binatog ti kanta, mawarwar metten dagiti eksena ti sarita, babaen iti kastoy a tekniko: agdama a situasion santo agtinnag iti taldiap-napalabas - ket no agtunged daytoy, mairugi manen ti binatog ti kanta tapno sumrek ti sabali manen nga eksena.

Madlaw a nagpada la unay ti tekniko ti panagiparang ti "Sumasayyo" a 1^st Prize ken ti "Kanta iti Sab-ok Ti Agpakada a Malem" a 2^nd Prize. Agpadada pay ti inusar a tekniko kadagiti binatog - subtext.

Iti "Sumasayyo" dagiti salmo dagiti sumasayyo ti nausar a panglukat ti sarita idinto ta kanta iti "Kanta iti Sab-ok ti Agpakada a Malem."

Ti laeng klase/kita ti sarita ti nagdumaanda.

Ket no kastoy nga agduma ti klaseda, sumurot met no dadduma ti tema.

Ti "Kanta iti Sab-ok ti Agpakada a Malem" ket maysa a gagangay a love story a nagkawes iti recordatio.

Ti "Suymasayyo" ket maysa a developmental story.

No pagdiligen dagitoy a dua, napigpigsa ti kidag ti sarita a developmental story ta sakupenna ti amin - ta maysa ngamin daytoy a literature of hope and growth a nanggubuay iti maysa a panagbalbaliw ti bagi/kinatao, gimong ken lugar iti panawen nga indiaya ti author. Dagiti kakastoy a sarita ket saan laeng a ti bukod a parikut ti nadakamat no di ket para iti gimong a kalpasan a mawarwar dayta a parikut iti bukod a bagi ket nawarwar met ti parikut ti gimong. Iti developmental stories - IMPLUENSIA ti kadakkelan nga armas ken talugading daytoy a sarita tapno ibalatna dagiti kalabanna iti pasalip. Impluensia - to influence people.

Idinto ta ti "Kanta iti Sab-ok..." ket simpatia laeng ti itdenna. Iti libro a Duyog ti Singasing II nadakamat a dakkel ti pagdumaan ti impluensia ken simpatia.

Iti "Kanta iti Sab-ok ti Agpakada a Malem" dika pay la nakatengnga, naawisnan ti immatang ti reader. Ta ngamin guyguyogoyen ti author dagiti reader babaen ti panagusarna iti tekniko ti panagiparang kadagiti binatogna ti pigura dagiti balikas (figure of speech) nga ECHOING.

ECHOING - repetition of certain word or phrases, sometimes slightly differ each other meaning. Echoing reinforces important ideas. And entertain a delight word play.

Echoing, kailian, ti kapipintasan amin a ramen ti maysa a sarita a mangaw-awis iti simpatia. Daytoy echoing ti inar-aramat ni William Shakespeare kadagiti sinursuratna tapno iti kasta, makaawis iti simpatia kadagiti sinuratna ket makuna a makapnek agsipud ta naibalud ni author ti rikna dagiti reader babaen dayta a komunikasion ti simpatia.

Iti daytoy a kaso, nagballigi ti "Kanta iti Sab-ok iti Agpakada a Malem" a nangiyalat ti "Reader's Choice Award" iti Internet, gapu iti simpatia. Adda ti simpatia dagiti nakabasa daytoy a sarita iti bida a lakay.

Ti ehemplo ni William Shakespeare a naadaw iti: (King Richard)

And my for little grave
A little grave, a little grave
An obscure grave...

Naulit-ulit dayta man nay, little, grave, little grave.

Ti kapipintasan amin a nakitak nga echoing iti "Kanta iti Sab-ok iti Agpakada a Malem":

WEN, nanangda, ibatim kaniak amin a dagensen 'ta puso ken barukongmo. Dimo awiten ida. Nadagsenda! Ibatim kaniak ta siakto ti mangawit kadakuada a dumanon iti nakaikarianta. Nalap-itka,
nanangda, ket saanmo a kabaelan ti kadagsenda. Ibatim kaniak, nadagsenda! Siakto ti mangisaklang kadakuada. Ibatim kaniak ida.

Nagduaak a pinetpetan dagita dua a dakulapmo, nanangda. Nariknak ti isasabat ti barada. Gimluong manen a kas gurruod iti bulan ti Abril iti unegko. Ibatim kaniak ida. Nadagsenda! Nariknak ti irut dagita ramaymo a nangpetpet kadagiti ramayko, nanangda. Pagammuan, nagrikep dagita matam ket limmukay dagita ramaymo sa nariknak ti itatayab ti pudotda.Immagibas ti pul-oy a kasla nangakup kenka iti baet ti panagarubos dagiti kasasaeman a luak nga impusuak ti aglulumba a kadadagsenan a saibbek.

Ibatim ida, nanangda, ta nadagsenda! Ibatim ida kaniak. Nagallangogan itan ti timekko ket immaweng a kasla pinugsatna dagiti bamban a nagkerker kadagiti pan-aw a sinusuon ti pagparsa a bubong. Kimmudrep ti panagkitak gapu ta linemmesen ti kakaapgesan a lua dagiti matak ket kasla nakitak a napisang dagiti uppat a diding a narra iti pagtaenganta.

Ibatim ida kaniak, nanangda!

Wen, ibatim ta nadagsenda!

Ditoy naulit-ulit dagiti binatog (phrase) wenno balikas (word). Ti laengen balikas nga ibatim ket naulit iti maminsiam a daras! Ti ibatim ida, ken ti ibatim kaniak... Ken dadduma pay a kas ti nadagsen a naulit iti maminwalo a daras!

Kinapudnona, idi rugiak a basaen daytoy a sarita ket immapayen kaniak ti maysa a pakasaritaan ti pudno a biag ti pakasaritaan ni (?) ...nalipatak metten ti naganna? Mila kadi? Ni Mila kunata, lattan, kailian. Agpadada da Mila ken ti ina iti (Kanta...) iti sakit. It-ited met ti asawa ni Mila ayat a "Till Death Do Us Part", ti ayat, pammateg a naisalsalumina. Kinapudnona ket, iti panagayat ti asawa a lalaki, simmalida a dua iti "Fun Run" maysa a marathon ket nangabakda iti 2^nd Prize(?). Nakawheel chair ti babai nga isu ti idurduron ti asawa lalaki kabayatan ti panagtarayna. Iti daytoy a kaso, ti lubong ket addaan iti simpatia iti lalaki. Panagraem iti ayat nga agubbog iti pusona. Panagdayaw iti kinapudnona nga agayat "Till Death Do Us Part". Sibibiag pay laeng iti agdama ni Mila, kailian, kaub-ubinganda pay laeng nga agassawa ta maysa pay laeng ti anakda. Naipablaak ti pakasaritaanda iti Philippine Daily Inquirer ken nai-feature iti "Magandang Gabi Bayan" ti ABS-CBN.