Umuna a Libro ti RFAAFIL

SAGUT: DAGITI 10 A KAPINTASAN A SARITA ITI RFAAFIL 2002-2004

PANANGIPATEG iti pagsasao nga Ilokano ti gapuna no apay a naipasngay ti libro a SAGUT.

Nayalnag idi Abril 3, 2004 iti LPI-Canteen, Makati City ti libro a SAGUT: Dagiti 10 a Kapintasan a Sarita iti RFAAFIL 2002-2004, antolohia dagiti sarita a napili iti umuna ken maikadua a pasalip ti RFAAFIL a nangtratar iti tema a maipanggep iti pamilia ken panagsakripisio a mangipakita met iti kultura ni Ilokano.

Panagsakripisio ti tema dagiti sarita iti RFAAFIL 2003-2004 a nairaman iti umuna a paset ti libro. Maibilang met a sakripisio kadagiti mannurat a nangipaay iti panawenda a nagputar kadagitoy a sarita: "Duayya ti Ayat iti Binakul nga Ules" ni Danilo B. Antalan; "Bukod a Daga" ni Prescillano N. Bermudez; "Dagiti Nalusak a Karabasa ken Tabungaw" ni Bagnos G. Cudiamat; "Maysa a Linabag ti Biag ni Segundina De Dios" ni Francisco T. Ponce; ken "Kari ti Parbangon nga Apagsipasip" ni Agustin DC. Rubin.

Maipanggep iti pamilia ti tema dagiti sarita iti RFAAFIL 2002-2003 a nairaman iti maikadua a paset daytoy a libro. Panangipateg iti pagtaengan a pakasakduan kadagiti napateg a sursuro ti ipasagepsep dagiti mannurat kadagitoy a sarita: "Ti Sagu ni Ama Beren" ni Julio V. Belmes; "Opcel ken Chipmonk: Iti Lohika ti Lasag" ni Jaime G. Raras; "Kanta iti Sab-ok ti Agpakadan a Malem" ni Agustin DC. Rubin; "'Sumasayyo'" ni Fernando B. Sanchez; ken, "Dung-aw" ni Ariel S. Tabag.

Ti pannakailibro a dagus dagiti sarita a nangabak iti pasalip ket maysa nga arapaap a pinadas a gaw-aten ni RFAAFIL. Dagiti mannurat a nangiburay iti tiempo, sirib, ken ayatda a nangsangal kadagitoy a sarita ti kangrunaan a gapu no apay a natungpal daytoy nga arapaap- arapaap a mangitalimeng kadagiti nabalitokan a sarita a pagulidanan, pagsarmingan, ken pagtamdan dagiti annak ni Saluyot iti agdama ken kadagiti masungad a panawen.

Paset ti panagyaman, panagrukbab, ken panangitan-ok ti RFAAFIL kadagiti gapuanan dagiti mannurat iti Iluko ti pannakaisarusar dagitoy babaen ti RFAAFIL Reader's Choice Award. Panagtultuloy a pannakaputar dagiti de-kalidad a sarita ken panagrang-ay ni mannurat, ti GUMIL, ken ti Literatura Ilokana ti kangrunaan a panggep daytoy nasao nga award babaen ti ayat ken tulongmo kas agbasbasa. Napadayawan ti sarita a Kanta iti Sab-ok ti Agpakadan a Malem, a gapuanan ni Agustin DC. Rubin, a kas umuna nga immawat iti RFAAFIL Reader's Choice Award.